Nós Diario, primeiro medio en galego en superar os 40.000 seguidores en twitter
A conta oficial de Nós Diario é a cuarta máis seguida entre os xornais que se publican na Galiza.
A conta oficial de Nós Diario superou os 40.000 seguidores e seguidoras en twitter, converténdose así no primeiro medio informativo en galego en chegar a esta cifra. Este número fai tamén que o diario que publica Sermos Galiza S.A desde o 1 de xaneiro de 2020 e que colle o testemuño do semanario que se publica desde 2012, sexa o cuarto xornal con maior número de seguidores nesa rede social entre os que se publican na Galiza.
Só La Voz de Galicia, Faro de Vigo e El Correo Gallego teñen máis seguidores en twitter. Os 40.000 usuarios e usuarias de Nós Diario sitúan a conta oficial en twitter do único diario que se publica en galego por diante das do resto de medios: La Opinión (36.500 seguidores), El Progreso (28.700), La Región (22.700), Diario de Pontevedra (18.000), El Ideal Gallego (15.000) ou Atlántico Diario (14.000).
A cifra de persoas que seguen a actualidade informativa a través da conta de Nós Diario en twitter é tamén maior que a que o fai a través doutros medios en galego, como Galicia Confidencial (29.000) ou Praza Pública (28.000). Unha diferenza que tamén se dá noutra rede social, Facebook, onde Nós Diario suma máis de 48.600 seguidores; Galicia Confidencial 45.000 e Praza Pública, 22.000.
Entre as contas para Galiza dos grandes medios estatais, só a de El País Galicia (127.000 seguidores) supera Nós Diario, que fica por diante das de El Diario Galicia (6.000), ABC Galicia (5.000),
Desde o seu nacemento, Nós Diario apostou en combinar papel e web como as dúas patas do seu proxecto informativo. Nós Diario editase en papel de terzas a sábados, día en que o acompañará un Sermos Galiza a modo de semanario. Na rede, edítase os 365 días do ano, tendo conta da actualidade máis inmediata.
Subscríbete