"Non é xustiza se é machista!"
Un clamor contra a sentenza de 'La Manada". Iso foi o que se ergueu este serán nas rúas de Galiza, con múltiples concentracións nas cidades e vilas do país. O movimento feminista voltou a mobilizar miles de persoas. Para a grande maioría das participantes nestas concentracións, as institucións non só non protexen as mulleres, senón que as agreden, como mostraría a resolución xudicial que exonerou de violación os agresores da moza madrileña.
"Contra todo agresor a manada somos nós" e "non foi abuso, foi violación" foron algúns dos cánticos máis coreados nas concentracións que se viviron este serán na Galiza, algunhas multitudinarias como as de Vigo e Coruña.
O movimento feminista galego mostrou, mais unha vez, e despois do grande suceso do 8M, a súa capacidade de convocatoria, chamando a participar nun total de 31 concentracións, nas 7 cidades e nas vilas cabeceiras de comarca do país.
A atmosfera nas concentracións abalou entre a raiba e a indignación perante unha sentenza que é recibida polo feminismo como unha resolución xudicial que ampara a violencia machista, como un insulto contra todas as mulleres.
Ao noxo e á repulsión por este novo ataque aos dereitos das mulleres -"no Estado español sae ben barato ser violador", o comentario aparecía en todas as conversas- uníronse tamén a emoción por tanto berro partillado, a solidariedade coa vítima e a determinación de intensificar a mobilización contra as agresións do patriarcado.