Os Ninguéns alerta en Vigo de que "as luces de Nadal non agochan a emerxencia social" polo aumento das persoas sen fogar

Baixo o reloxo que na rúa do Príncipe marca a conta atrás para a chegada do Nadal a Vigo, o foro Os Ninguéns advertiu esta quinta feira de que a festa máis mediática do ano non logra disipar a sombra dun fenómeno que "non deixa de medrar na cidade": o aumento das persoas sen fogar.

Decenas de persoas concentráronse para pedir ao alcalde de Vigo, Abel Caballero, que "non se deixe cegar polas luces" e que mire máis alá do brillo, cara á realidade de quen vive sen teito nin apoio institucional. "Detrás do espectáculo hai unha cidade que sofre", resumiron.

O colectivo denuncia que cada vez son máis os veciños e as veciñas que dormen en plena rúa ou en condicións indignas, en naves abandonadas, ruínas ou infravivendas. Calculan que máis dun cento de persoas sobreviven hoxe sen fogar en Vigo, moitas delas con problemas de saúde mental ou adiccións "sen apoio sanitario nin social suficiente".

Os Ninguéns lembran que os tres albergues existentes —un municipal— non cobren a demanda actual. Ademais, o sistema obriga os usuarios e as usuarias a abandonar o recurso en poucos días, "o que os devolve á rúa sen alternativas reais".

Unha situación "insostíbel"

O foro critica tamén que as distintas institucións, nomeadamente o Concello e a Xunta da Galiza, "se limiten a pasar a pelota unhas a outras" sen artellar unha resposta coordinada e estábel.

O recente falecemento de dúas persoas sen fogar —unha delas en circunstancias violentas na contorna da antiga estación de autobuses, e a outra nunha nave en ruínas— volveu pór o foco nunha situación que consideran "insostíbel".

Así, Os Ninguéns reclaman ao Goberno local a posta en marcha dun plan integral para as persoas sen fogar que inclúa vivendas de emerxencia, programas de inserción laboral e apoio sanitario e psicolóxico. "A idea de que en Vigo durme na rúa quen quere", difundida polo Goberno local, "é falsa e cruel", subliñan.