As e os responsábeis de administración de dúas empresas navieiras que están a ser investigadas pola sobrevenda de billetes para visitar as Illas Cíes rexeitaron hoxe nos xulgados calquera actividade ilegal.
A través dos seus letrados defensores, aludiron a supostos problemas na aplicación da Xunta que xestiona a venda dos pasaxes.
Polo que comentou un dos avogados, a Xustiza céntrase no que sucedeu o 20 de agosto de 2017, cando chegou moita máis xente da permitida ao Parque Nacional das Illas Atlánticas.
Por iso, o representante da firma Nabia, destacou que a xerente atendeu “a todas as preguntas durante a súa declaración”.
Ademais, nesta cuarta feira tamén compareceu o responsábel de Tours Rías Baixas, que contestou só a preguntas do seu avogado e tamén negou a suposta ilegalidade.
Para defender a inocencia do seu representado, destacou que a aplicación da Axencia para a Modernización Tecnolóxica de Galicia (Amtega) para xestionar os billetes “presentaba fallos no sistema”. “De feito cambiárona despois”, asegurou, engadindo que o conteo tamén tivo erros porque se fixo a man e non cos códigos QR.
Segundo o ministerio público, malia que o número máximo de visitas diarias a estas illas é de 2.000 persoas e que a emisión de pases vai a través dun sistema da Xunta, “as navieiras emitían pasaxes de forma fraudulenta, a través de billetes cos códigos QR duplicados ou cos números de identificación alterados”.
