Aumentan un 3,4% as mulleres vítimas de violencia de xénero na Galiza
Os órganos xudiciais da Galiza recibiron no primeiro trimestre do ano 1.434 denuncias por violencia de xénero, un 1,6 % máis que no mesmo período do ano pasado, cando se presentaron 1.412. A gran maioría das denuncias -1.136- chegaron aos xulgados a través de atestados policiais con denuncia da vítima, segundo informa o Tribunal Superior de Xustiza da Galiza nun comunicado.
Na Galiza rexistráronse durante o primeiro trimestre deste ano 1.434 mulleres vítimas de violencia de xénero nas denuncias recibidas, fronte ás 1.387 das mesmas datas de 2020, o que supón un incremento de 3,4%. Cabe destacar que os datos do primeiro trimestre do 2020 reflicten a incidencia da crise sanitaria da Covid-19, a pesar de que a actividade dos xulgados de violencia sobre a muller foi declarada esencial e non quedou afectada pola suspensión dos prazos procesuais nin paralizada en ningún momento.
Segundo os datos estatísticos feitos públicos hoxe polo Observatorio contra a Violencia Doméstica e de Xénero do Consello Xeral do Poder Xudicial (CGPX), na Galiza os casos de vítimas que se acolleron á dispensa para non declarar descenderon un 18,9 %. Se nos tres primeiros meses de 2020 optaron por esta opción 122 mulleres, no mesmo período de 2021 fixérono 99, é dicir, o 6,9 % das vítimas.
Taxa de violencia de xénero
Galiza situouse como a cuarta comunidade coa taxa de violencia de xénero -mulleres vítimas por cada 10.000 mulleres- máis baixa do Estado, con 10,3 persoas, fronte ás 14,2 de media estatal. Durante o primeiro trimestre do ano solicitáronse 371 ordes de protección nos órganos xudiciais da comunidade, fronte ás 529 de 2020, o que supón un descenso de 29,9%. Das 371 adoptáronse 232, 62,53 %.
Un 84,18 % das persoas axuizadas no territorio galego por delitos relacionados con violencia de xénero entre o 1 de xaneiro e o 31 de marzo deste ano foron condenadas. Este dato sitúa á comunidade por baixo da media estatal, que foi do 86,72 %.
*Esta información foi editada e actualidada para atender á corrección da porcentaxe de vítimas de violencia de xénero realizada polo Tribunal Superior de Xustiza da Galiza por un erro no comunicado orixinal.