O movemento feminista sae ás rúas contra a violencia machista
Convocan concentracións a sexta feira (1 de xaneiro) perante o asasinato de M.R.B. en Mos. Horas e lugares no interior.
Á espera de que as autoridades policiais e xudiciais o confirmen, o asasinato de María R. B. e Mos podería tratarse do sétimo --segundo as cifras oficiais-- na Galiza e do décimo de se contabilizaren Sergio Rodríguez --asasinado en Arbo xunto a Beatriz Rodríguez-- e as dúas crianzas de Moraña, Amaia e Candela.
Neste senso, o movevemenro feminista vén de lanzar unha nova convocatoria de mobilizacións por todo o país coas que queren amosar o seu rexeitamento á violencia machista. Unha medida que se adopta no noso país de maneira automática o día despois de aparecer recollido na imprensa a motivación machista dos crimes.
"Ningunha agresión ficará sen resposta", aseguran. "Estaremos na rúa mentres se manteñan as estruturas e os valores patriarcais que perpetúan e consolidan na sociedade esta violencia sexista, este feminicidio, estas agresións e asasinatos de mulleres".
Horas e lugares das concentracións:
- A Coruña, no Obelisco ás 20 horas.
- Vigo ás 20 h no Marco.
- Ourense ás 20 h na Castañeira.
- Ferrol, ás 20 h diante do Concello.
- Compostela, na Porta do Camiño ás 20 h.
- Val Miñor, 18h, no Parque da Ramallosa
Maos tratos xulgados como insultos
M.R.B. interpuxera unha denuncia contra o seu compañeiro en outubro de 2014 por "maos tratos físicos e psicolóxicos habituais" de acordo coa información transmitida pola Delegación do Goberno español na Galiza e que foi tamén confirmada polo TSXG.
Así as cousas, o proceso xudicial derivou na abertura dun xuízo oral por insultos. M.R.B finalmente retirou a denuncia.
Segundo Santiago Villanueva "probabelmente" o home pase a disposición xudicial esta quinta feira.