As mortes da segunda vaga da pandemia xa superan as da primeira

As mortes da pandemia na Galiza eleváronse a 1.250 despois de que a Consellaría de Sanidade notificase o sábado catro novos falecementos, dous deles relacionados coa residencia Asilo de Vilalba intervida pola Xunta da Galiza.

Na sexta feira, foron dez os pasamentos dos que informou Sanidade. Así, a partires deste mes de decembro xa faleceron máis persoas con coronavirus que na primeira vaga da pandemia.

No mes de novembro a Consellaría de Sanidade notificou 280 falecementos relacionados coa Covid-19, converténdose este no segundo mes con peores cifras de pasamentos desde marzo.

En outubro, a consellaría informou de 167. Na primeira vaga do coronavirus perderon a súa vida 619 persoas, mentres que na segunda os falecementos ascenden a 631.

Falecementos en residencias

Segundo os informes publicados pola Administración galega, do total de 1.250 falecementos 524 corresponden a usuarios e usuarias de residencias da terceira idade. Entre os meses de novembro e decembro faleceron 185 residentes.