O monográfico de Sermos Galiza sobre os entroidos, xa nas librarías
O novo caderno monográfico da colección “De Nós”, editada por Sermos Galiza, S.A., con imaxes do fotógrafo compostelán Santos, xa está dispoñíbel nas librarías do país.
Chegou aos andeis das librarías o monográfico sobre os entroidos rurais galegos editado por Sermos Galiza S.A. dentro da colección “De Nós”. A publicación recolle máis de medio cento de entroidos, boa parte deles sen apenas difusión, e reproducen as imaxes do fotógrafo compostelán e xubilado de TVE Alfonso García Santos.
Prologado polo arqueólogo e museólogo Felipe-Senén, o monográfico, o primeiro destas características na Galiza, permite coñecer nun día, e sen saír da casa a Marela de Maceda; a Morena de Matamá; a Pita das Eiroás; a Queima do Meco; a Solta da Marela de Maceda; as figuras de animais no entroido; as Bonitas de Sande; Baixada da Morena de Laza; Boteiros de Trives; Boteiros de Viana do Bolo; Boteiros de Vilariño de Conso; Charrelos de Baños; Chocalleiro de Vilardevós; Cigarróns de Verín; Entroido Ribeirao; Fareleiros; Felo de Garabás; Felos de Boborás; Felos de Esgos; Felos de Maceda; Gárgolas de Celanova; Galos da Mezquita; Labardeiros de Mugares; Máscaras de Buxán; Madamas e Galáns de Cobres; Madamitas de Entrimo; Maragatos de Laza; Mázcaras da Xironda; Mázcaras de Manzaneda; Meco das Teixugueiras; o Boi da Veiga; o Cabreiro de Muíños; o Cigarrón de Verín; o Exército dos panos; o Fedelloso de Meira; O Folión; o Irrio de Lumeares; o Meco da Xironda; o Meco das Teixugueiras; o Oso de Salcedo; o Rei de Covelo; o Xigante e o Touro de Celavente; o Vellarrón de Riós; o Vello dos Cornos de Vila de Cruces; o Zarramanculleiro de Cualedro; os Chambergos de Santeles; Pantallas de Xinzo; Peliqueiros de Campobecerros; Peliqueiros de Laza; Troteiros de Bande; Vergalleiras das Teixugueiras; Vergalleiros de Sarreaus; Vixigueiros de Samede e os Xenerais da Ulla.
Baixo o título Antroidos e máscaras na Galiza rural, o monográfico, de máis de cen páxinas, dá a coñecer as variedades tradicionais, aquelas que distan das fórmulas importadas e uniformadas e das carautas de plástico á venda nos bazares. As subscritoras e subscritores do semanario Sermos Galiza recibiron nos seus enderezos postais un exemplar da publicación como agasallo. Alén da venda en librarías, a publicación está dispoñíbel a un prezo de 19,90 euros na loxa.