O Ministerio di agora que non se pode elixir entre AstraZeneca e Pfizer

“Un gravísimo problema de comunicación”. Así é como define o Ministerio de Sanidade a crenza de que as persoas menores de 60 anos que recibiron a primeira dose de AstraZeneca poden elixir entre o soro da anglosueca e o de Pfizer. Un extremo que na Galiza é posíbel e, de feito, na quinta feira o Sergas comezou a vacinar coa segunda dose do soro que elixisen menores de 60 anos inoculados con AstraZeneca.

De feito, na quinta feira, o conselleiro de Sanidade, Julio García Comesaña, volveu insistir na idoneidade de completar a pauta coa vacina de AstraZeneca.

O Ministerio fixo esta apreciación porque busca, dixo, "evitar unha morte por cada millón de vacinados" co soro da compañía anglosueca. De feito, no día de onte confirmou catro mortes tras vacinarse con AstraZeneca, cunha media de idade de 43 anos e hai un quinto caso en estudo.

"Cando se toma unha decisión deste tipo, faise en aras de garantir o beneficio e a condición de que exista unha alternativa, e no Estado español tiñamos vacinas alternativas que poñer", insistiron na noite da quinta feira fontes do Ministerio, reiterando a importancia de cumprir a decisión acordada na última Comisión de Saúde Pública.

Tal e como lembraron, Sanidade tomou a decisión a principios de abril de vacinar con AstraZeneca só maiores de 60 anos pola aparición de eventos trombóticos "moi raros" sobre todo en persoas de menor idade, seguindo o exemplo doutros países europeos como Francia ou Alemaña.

Neste sentido, o Ministerio detallou que o número de casos tromboses con trombocitopenia notificados en poboación de 30 a 39 anos é de 14 casos por cada millón; na de 40 a 49, dun total de 12 casos por cada millón.

Doutra banda, recalcou que os resultados preliminares do ensaio clínico 'CombiVacs', posto en marcha polo Instituto de Saúde Carlos III, e que demostra a eficacia dunha segunda dose de Pfizer despois da de AstraZeneca, "non disparou a decisión da Comisión de Saúde Pública", senón que é "un dato adicional", pois a decisión tomouse "fundamentalmente á vista dos datos de seguridade".

Neste sentido, fontes do Ministerio aclararon que a única pregunta á que pretendía responder o estudo é se a administración dunha vacina con tecnoloxía de ARN mensaxeiro, como é o caso de Pfizer, incrementaba a resposta inmune. "O que se viu no ensaio clínico de AstraZeneca é que cando se administra a segunda dose, o nivel de anticorpos multiplícase entre 3 e 4 veces, e con ' CombiVacs' demostrouse que se multiplica por 40, dando seguridade á decisión".

Con todo, lembran que ao estudo lle falta "un brazo", é dicir, completar o ensaio con vacinados coas dúas pautas de AstraZeneca. En canto ao feito de inmunizarse cun esquema heterólogo, desde Sanidade transmiten unha mensaxe de tranquilidade e lembran que non é a primeira vez que se fai cunha vacina, xa que "é unha práctica bastante habitual, como ocorre coa vacina do ébola, e no Estado español coa do meningococo ou o neumococo, entre outras".

Por último, aclararon que neste contexto de "virus endémico", que podería quedar durante uns anos e para o que, por tanto, se precisarían dose de recordo, "non é improbábel que moitas das persoas vacinadas con tecnoloxía de adenovirus, como AstraZeneca, reciban vacúas doutras plataformas, como de ARN mensaxeiro ou vacina de proteína, como a de Novavax".