Milleiros de persoas maniféstanse en Compostela contra "a privatización e o desmantelamento" da sanidade pública

Milleiros de persoas percorren as rúas de Compostela convocadas pola plataforma SOS Sanidade Pública manifestándose baixo o lema ‘Máis Atención Primaria, máis Atención Hospitalaria e máis Sanidade pública’.

A marcha, que recibiu un amplo respaldo por parte de diversos colectivos, tanto do ámbito político como do civil, saía ás 12 horas da Alameda compostelá e percorre varias rúas da capital até finalizar na Praza do Obradoiro.

En declaracións aos medios antes de iniciar a protesta, o portavoz de SOS Sanidade Pública, Manuel Martín García, denunciou que Galiza ten unha atención primaria "desmantelada, inaccesíbel e con tempos de agarda superiores a unha media de sete días".

"Estamos outra vez aquí para expresar o malestar e o resentimento da poboación galega coa situación da sanidade pública, temos unha atención hospitalaria que non funciona como debe por falta de persoal e por unha xestión dos hospitais públicos que non permite a utilización plena dos recursos instalados", aseverou.

O PP "un perido para a saúde dos galegos"

Minutos antes de comezar a manifestación, a portavoz nacional do BNG, Ana Pontón, denunciou que o PP "se está convertendo nun perigo para a saúde dos galegos" con "recortes e privatizacións" na sanidade pública. Nesta liña, a nacionalista asegurou que o "único" que ofrecen os populares nesta materia son "mentiras e bulos".

"O único que lle ofrece á cidadanía do noso país o PP son mentiras e bulos, din que que a sanidade pública está mellor que nunca, se está mellor que nunca, como é posíbel que teñamos 11.000 nenos sen pediatra? Como é posíbel que en todo o país teñamos todas as semanas mobilizacións dicindo que a xente deste país non está disposta a que se siga deteriorando a sanidade pública?", aseverou.

Ademais, Pontón incidiu en que "non é incompetencia, é ideoloxía, ideoloxía dun Partido Popular que quere deteriorar o público para beneficiar á sanidade privada".

"Os recortes non son un accidente"

Desde o PSdeG, o seu secretario xeral, José Ramón Gómez Besteiro, instou o presidente da Xunta, Alfonso Rueda, a que aposte pola sanidade pública e "poña fin á política de recortes". Neste sentido, asegurou tamén antes de iniciarse a manifestación que a protesta convocada por SOS Sanidade Pública "é unha chamada de atención ao Goberno do PP".

Ademais, Besteiro denunciou que "cada recorte que se fai na sanidade pública vai directamente ao peto da sanidade privada". Neste sentido, asegurou que "os recortes non son un accidente, son unha decisión política da dereita para condenar á sanidade pública", aseverou o líder dos socialistas galegos.

Con todo, incidiu en que a Atención Primaria " ten que ter máis recursos, máis profesionais e máis centros de atención ao longo de toda a xeografía de Galicia".

A estratexia para favorecer a sanidade privada

O Secretario Xeral de Movemento Sumar Galicia, Paulo Carlos López, e varios membros da organizacióntamén participaron este domingo na manifestación. En declaracións aos medios, López asegurou que “é evidente que a sanidade pública galega está cada vez peor, a pesar de que o PP continúa negándoo sen ningún tipo de rubor”.  Por iso recoñecer que lle molesta “como usuario da sanidade pública que diga que vai mellor. Eles que saberán, se van á privada”. 

Neste sentido, López considera un dos principais problemas da sanidade pública galega é a situación do persoal, “con profesionais saturados, moitas citas, poucos minutos por paciente e unha precarización xeral das condicións laborais” , algo que considera que é “unha estratexia deliberada que favorece aos intereses privados en detrimento da saúde da cidadanía galega”. 

O PP "favorece os negocios privados"

Isabel Faraldo, coordinadora nacional de Podemos Galicia, tamén participou, xunto con membros da dirección galega e militantes do partido, na manifestación. A dirixente de Podemos sinalou ante os medios de comunicación que Alfonso Rueda e o conselleiro están a sumir á nosa sanidade nun caos total. A falta de medios humanos e materiais está a poñer en risco a saúde" e por este motivo cre que é urxente "reforzar a atención primaria por ser un elo fundamental no sistema sanitario".

"Non pode ser que esteamos días esperando para ser atendidas pola médica ou médico de cabeza porque están desbordados ou porque non se cobren as vacantes", asegurou Faraldo que engadiu, ademais, que "o Goberno do PP busca dinamitar a sanidade pública para favorecer o negocio dos seguros privados". 

"Un dos mellores sistemas sanitarios do mundo" para o PP

Desde o Gobernbo galego, o conselleiro de Sanidade, Antonio Gómez Caamaño, defendeu este domingo que Galiza ten "un dos mellores sistemas sanitarios do mundo", mais admitiu que "hai cousas que mellorar" e "farémolo".

Neste sentido trasladou o seu "máximo respecto" a todas as persoas que, "con boa intención", se manifestan, mais "non comparte en absoluto" os motivos que alegan as organizacións convocantes.

O titular da carteira sanitaria galega asegurou que "non se pode falar" dun sistema sanitario terceiromundista cando "temos o que temos: o programa de vacinación maior do mundo, programas de cribado punteiros, protonterapia, código ictus e o 061".