Centos de alegacións desde o Val do Dubra contra o vertedoiro en Pedra Facha
O proxecto de converter a antiga canteira de Pedra Facha nun vertedoiro a ceo aberto leva meses unindo a veciñanza dos concellos de Val do Dubra (comarca de Compostela) e Trazo (comarca de Ordes) na oposición a esta iniciativa, que entenden como prexudicial para ambos os dous municipios.
Esta sexta feira, unha delegación da veciñanza rexistrou na sede central da Xunta da Galiza, en San Caetano, Compostela, case 1.000 alegacións contra este vertedoiro. A estas firmas hai que engadir as que se presentaron a través do Rexistro do Concello ou de forma telemática.
“En Val do Dubra continúan en activo 133 explotacións gandeiras, cun censo de 5.387 cabezas de gando bovino, un reflexo da importancia histórica deste sector no concello, especialmente no tocante ao lácteo”, afirman dese a plataforma que se opón a este proxecto.
Desde a Asociación Medioambiental de Niveiro expuxeron ao longo destes meses que “non podemos permitir que este sen sentido de proxecto remate coa vida e o futuro dos nosos fillos”.
Un proxecto, afirman, que pretende a apertura dun vertedoiro de residuos a ceo aberto a menos de un quilómetro das vivendas e das explotacións gandeiras “non pode ter un informe ambiental favorábel". "Instamos a Xunta da Galiza a manifestarse e a dar transparencia a situación de este proxecto que tanto preocupa os veciños de Val do Dubra e concellos lindeiros", conclúen.
