![Unha brigada rega o perímetro dunha zona de difícil acceso en Flariz, Monterrei [BrifLaza].](/asset/thumbnail,1280,720,center,center/media/nosdiario/images/2020/07/26/2020072610460238241.jpg)
O incendio de Monterrei, que xa arrasou 720 hectáreas converténdose no de maior envergadura no que vai de verán na Galiza, continúa activo segundo informa a Consellaría do Medio Rural.
O lume afecta á parroquia de Flariz e na madrugada do sábado obrigou a activar a alerta por proximidade de vivendas, ficando fóra de risco a primeira hora da mañá dese mesmo día. Parte dos terreos queimados son de uso agrícola, indica Medio Rural.
Pola súa banda, están extinguidos os incendios de Viana do Bolo e Verín após queimaren case 355 hectáreas.
O de Viana do Bolo deixou afectada unha superficie de 210 hectáreas, das que 159 son de monte raso e o resto, arboredo. O Goberno galego apunta a unha orixe intencionada neste caso, posto que se rexistraron até cinco focos diferentes a cuarta feira.
Pola súa banda, o de Verín calcinou case 144 hectáreas, das que 105 son arboredo.
