Máis de 80% dos casos de coronavirus no mundo non foron contabilizados, segundo un estudo matemático
Modelos matemáticos desenvoltos polo Colexio Médico de Xeorxia, en Estados Unidos, concluíron que tan só se contabilizaron un de cada cinco casos de Covid-19 durante os primeiros 29 meses de pandemia.
A Organización Mundial da Saúde (OMS) ten rexistrados 513.955.910 de casos desde o 1 de xaneiro de 2020 até o 6 de maio de 2022, así como 6.190.349 mortes, cifras que xa fixeron que a Covid-19 sexa nunha das principais causas de morte nalgúns países, xusto por detrás das enfermidades cardíacas e o cancro.
Con todo, estes modelos matemáticos, cuxos resultados se publicaron na revista científica 'Current Science', indican un subrexistro xeral de casos que oscila entre 1 de cada 1,2 e 1 de cada 4,7. Esa infradeclaración tradúcese nunha estimación de entre 600 e 2.400 millóns de casos.
"Todos recoñecemos o enorme impacto en nós como individuos, como nación e como mundo, pero é moi probábel que o verdadeiro número de casos sexa moito maior do que cremos. Estamos a tratar de entender o alcance dos casos non declarados", comentou o doutor Arni S.R. Srinivasa Rao, director do Laboratorio de Teoría e Modelización Matemática da División de Enfermidades Infecciosas do Colexio Médico de Xeorxia.
Factores da infradeclaración
A ampla gama de casos estimados xerada polos seus modelos indica os problemas de exactitude das cifras notificadas, que inclúen a manipulación dos datos, a incapacidade de levar a cabo un seguimento preciso dos casos e a falta de uniformidade na forma de notificalos.
Estes modelos matemáticos utilizan calquera información dispoñíbel, así como factores relevantes como as taxas de transmisión global e o número de persoas no mundo, incluíndo a media da poboación durante o período de 29 meses. Esa media, denominada poboación efectiva, ten máis en conta as persoas que naceron e morreron por calquera motivo, polo que proporciona unha cifra máis realista das persoas que poderían estar infectadas.
"Hai que coñecer a verdadeira carga que soportan os pacientes e as súas familias, os hospitais e os coidadores, a economía e o goberno. Unhas cifras máis precisas tamén axudan a avaliar as implicacións indirectas, como o infradiagnóstico de trastornos neurolóxicos e mentais potencialmente prolongados que agora se sabe que están directamente asociados á infección", afirma Rao.
Outros factores que contribúen á infradeclaración son o feito de que todas as persoas que contraeron a Covid-19 non se someteron ás probas. Ademais, unha porcentaxe significativa de persoas, incluso as vacinadas e reforzadas, inféctanse máis dunha vez, e é posíbel que só acudan ao médico para someterse a unha PCR a primeira vez e que utilicen potencialmente probas caseiras ou mesmo ningunha proba para as enfermidades posteriores.