Máis de 67.000 comportamentos sancionábeis durante os dous estados de alarma na Galiza
As forzas de seguridade tramitaron 67.198 propostas de multa no país nos dous períodos nos que se estabeleceu esa ferramenta de control: do 14 de marzo ao 20 de xuño de 2020 e do 26 de outubro de 2020 ao 24 de marzo de 2021.
A Secretaría de Estado de Relacións coas Cortes e Asuntos Constitucionais vén de responder unha pregunta do PP sobre os comportamentos sancionábeis das e dos galegos durante os dous estados de alarma que impuxo o Goberno español desde que comezou a crise sanitaria.
Segundo este organismo, as forzas de seguridade tiveron que facer 67.198 suxestións de multa no país entre o 14 de marzo e o 20 de xuño do ano pasado e o 26 de outubro de 2020 até o pasado 24 de marzo que decaeu a vixencia desta ferramenta de control.
A Policía Nacional fixo case 20.000 dos trámites (19.749), mentres que a Garda Civil tramitou 35.122 propostas.
O resto das demandas de sanción, 12.327, foron enviadas por corpos da Policía Local de distintas localidades.
Por zonas, nas comarcas atlánticas do norte do país houbo máis incumprimentos por parte da cidadanía.
No primeiro estado de alarma, cando comezou a notarse a pandemia, a Delegación do Goberno do Estado na Galiza contabilizou 11.659 procedementos polo que a maior parte das actitudes reprobábeis déronse no segundo período, moito máis longo en tempo e con outra sensación colectiva sobre o virus.
O número total de expedientes burocráticos abertos representa practicamente o 5% do global rexistrado no Estado español.