Unha semana despois da finalización do estado de alarma, que supuxo a caída do fechamento perimetral e do toque de queda para toda Galiza, os principais datos da pandemia da Covid-19 manteñen unha tendencia descendente.
En concreto, de acordo coas cifras publicadas hoxe pola Consellería de Sanidade e con rexistros até as 18 horas do sábado, hai nos hospitais galegos un total de 173 persoas ingresadas con coronavirus, que son 29 menos que as 202 de sete días atrás.
Ademais, esta baixada mantense tanto nas hospitalizadas en planta, que son 138 -20 menos que a primeira xornada sen estado de alarma-, como nas unidades de coidados intensivos, xa que este domingo se sitúan en 35, nove menos que hai unha semana.
Na mesma liña, Galiza conta agora con 2.832 casos activos da enfermidade, 65 menos que os 2.897 de sete días atrás, mentres que se detectaron 126 novos contaxios nas últimas 24 horas, fronte aos 189 do dato de hai unha semana.
Comparativa co sábado
En calquera caso, facendo unha comparativa entre onte e hoxe, tan só a presión hospitalaria repunta lixeiramente, cunha persoa ingresada máis, mentres que os casos activos e as infeccións notificadas continúan en descenso.
No que respecta aos hospitais, as 173 ingresadas na Galiza repártense entre as 138 en planta, catro máis que nos datos do sábado; e as 35 na UCI, tres menos.
Por áreas sanitarias, o ascenso nas hospitalizadas reprodúcese na de Vigo, con 50 ingresadas (+2), a pesar de que baixan a 10 (-1) as pacientes críticas; na Coruña-Cee, con 46 hospitalizadas (+1), das que oito están en coidados intensivos (-2); e en Ourense-Verín-O Barco, con 14 (+2), deles dúas (sen cambios) en UCI.
Mentres tanto, non varían con respecto a 24 horas atrás a área de Lugo-A Mariña-Monforte, con 10 hospitalizadas, dúas deles en críticas; e a de Ferrol, con seis ingresadas, das que unha está na UCI.
No lado oposto sitúanse as áreas de Santiago-Barbanza e Pontevedra-O Salnés. Esta última contabiliza este domingo 27 ingresadas con Covid-19 (-2), aínda que se manteñen en nove as de coidados intensivos, mentres que na santiaguesa hai 20 hospitalizadas (-2), das que tres están na UCI.
Seguen á baixa os casos activos
En canto aos casos activos da enfermidade, descenderon por cuarto día consecutivo e, de acordo cos datos deste domingo, sitúanse en 2.832, 33 menos.
Esta baixada replicouse en practicamente todas as áreas sanitarias. Tan só suben na área de Ferrol, até as 87 pacientes (+2), aínda que na de Ourense-Verín-O Barco esta cifra segue en 211.
Así, descenderon nas áreas de Vigo, até os 849 (-5); na da Coruña-Cee, a 628 (-14); en Pontevedra-O Salnés, a 452 (-6); en Santiago-Barbanza, a 428 (-5); e en Lugo-A Mariña-Monforte, até os 177 casos activos (-5).
Suben os contaxios
Así mesmo, en toda Galiza detectáronse nas últimas 24 horas 126 novos contaxios de Covid-19 a través de calquera tipo de probas -118 casos confirmáronse cunha PCR-. Esta cifra, que é a máis baixa da semana, implica un descenso de 50 con respecto aos 176 que se notificaron a xornada anterior.
Do total das infeccións rexistradas, a área sanitaria de Vigo suma 34 novas, mentres que na Coruña esta cifra ascende a 30. A de Santiago notificou 20, a de Ourense 16, Lugo 10, Pontevedra nove e Ferrol só sete.
Por tanto, as contaxiadas de Covid-19 desde o inicio da pandemia en toda Galiza elévanse a 124.833, das que 30.085 corresponden á área da Coruña; 24.432 á de Vigo; 19.593 á de Santiago; 15.545 á de Ourense; 14.026 á de Pontevedra; 12.633 á de Lugo; e 8.519 á de Ferrol.
PCR e positividade
Desde o inicio da pandemia, Galiza realizou 2.167.999 PCR, o que supón que nas últimas 24 horas se fixeron 6.335 probas, arredor de 200 menos que as do día anterior.
Pola súa banda, a taxa de positividade -porcentaxe de infeccións por test PCR realizados- volveu descender até 2,4%, despois do 3% do sábado, e segue por baixo do 5% que a Organización Mundial da Saúde (OMS) fixa para dar por controlada a pandemia. A última vez que a Comunidade galega excedeu esta barreira foi o 15 de febreiro.
Falecidas e curadas
Galiza acumula desde o inicio da pandemia 2.401 persoas falecidas diagnosticadas con Covid-19, despois de que na xornada do sábado Sanidade non notificase ningunha nova vítima.
En canto ás persoas curadas deste coronavirus desde o inicio da pandemia, ascenden a 119.624, o que supón que no último día recibiron a alta 159 pacientes.
