Máis de 2.700 alumnas e alumnos prepáranse para a proba extraordinaria da ABAU desta semana
Un total de 2.751 alumnas e alumnos galegos enfrontaranse esta semana aos exames da convocatoria extraordinaria da Avaliación do Bacharelato para ou Acceso á Universidade (ABAU), que se desenvolverán en 14 comisións delegadas repartidas por toda o país.
As probas terán un calendario e unha estrutura practicamente iguais á ordinaria, decorridaos días 6, 7 e 8 de xuño. Así, a xornada arrincará ás 9 horas cunha presentación previa á realización do exame de Historia, ás 10. Seguirao o de Lingua Castelá e Literatura, ás 12; e xa pola tarde serán os das primeiras materias de modalidade, a escoller entre Matemáticas e Latín (16 horas) e Economía da Empresa e Deseño (18 horas).
Segundo datos da Comisión Interuniversitaria de Galicia (CiUG), os máis de 2.700 aspirantes que acoden a esta convocatoria extraordinaria repartiranse entre edificios universitarios das sete cidades galegas -652 en distintos centros de Vigo, 580 na Coruña, 518 en Santiago de Compostela, 246 en Ourense, 240 en Lugo, 233 en Pontevedra e 179 en Ferrol- e outras tres comisións periféricas en institutos de Viveiro (Lugo) con 47 alumnos, de Cee (A Coruña) con 38 e 18 na Rúa (Ourense).
Está previsto que as notas dos exames desta semana se coñezan a vindeira cuarta feira, día 19. As cualificacións da ABAU constan dunha primeira parte sobre 10 puntos que se obtén sumando 60% da media do bacharelato e 40% da media dos cinco exames que constitúen a fase obrigatoria. Para os alumnos de ciclos formativos, esta primeira cualificación é a media do seu expediente académico do ciclo.
Ademais, pódese chegar a alcanzar os 14 puntos examinándose de materias da denominada parte voluntaria, para o que se teñen en conta os denominados factores de ponderación, que son distintos en función do grao universitario ao que se queira optar.
Próximos pasos
A ABAU ordinaria de xuño alcanzou unha porcentaxe de aprobados na parte obrigatoria de 94,77%. Presentáronse 12.690 aspirantes, 99,14% dos matriculados.
Os que superaron esta primeira convocatoria xa puideron preinscribirse nos graos universitarios en días pasados -estabelecendo unha orde de preferencia- e a primeira lista de admitidos sairá, precisamente, esta terza feira, 11 de xullo.
Quen figure como aceptado nalgunha das carreiras nas que se preinscribiron poderán formalizar a matrícula entre os días 12 e o 14, aínda que poderían optar por esperar a próximas chamadas por se son aceptados noutro grao que sexa de maior preferencia.
A segunda chamada será o sábado 15, con matrícula do 16 ao 17 de xullo; e a terceira o 19, podendo formalizar a súa matrícula do 20 ao 21 de xullo. A partir da cuarta chamada, o 24 de xullo, xa se poderán incorporar os que aproben na ABAU extraordinaria.
Notas de corte
A CiUG ten publicado na súa web a listaxe de carreiras das universidades galegas coas notas de corte, que -convén lembrar- constitúen simplemente unha referencia, pois son as cualificacións obtidas polos alumnos que entraron en último lugar en cada grao o curso pasado.
As máis altas téñenas, como vén sendo habitual todos os anos, os dobres graos en Enxeñería Informática e Matemáticas (13,360), en Matemáticas e Física (13,282) e en Comunicación Audiovisual e Xornalismo (12,942), os tres pola Universidade de Santiago de Compostela (USC). Sen ser dobres titulacións, a carreira coa maior nota de corte é Medicina (12,792).