Esta segunda feira entregouse en Bruxelas unha carta aberta ao Vice-presidente da Comisión Maroš Šefčovič e os eurocomisarios Thierry Breton e Virginijus Sinkevičius rexeitando a nova estratexia europea de materias primas críticas lanzada este mes e denunciando o incumprimento da normativa europea na mina de San Finx (Lousame).
Na Carta Aberta, asinada por 234 entidades da sociedade civil e membros da comunidade científica, escolleron o caso da mina de estaño e volframio de San Finx (en Lousame) como exemplo ilustrativo da falta de control da Comisión Europea sobre os incumprimentos sistemáticos da lexislación da UE por parte das mineiras e dos Estados membros, o que deixa en evidencia os graves problemas ambientais que implicará a nova estratexia.
“Os problemas ambientais causados por esta explotación de estaño e volframio xunto coa sobra da corrupción que afecta a súa reapertura en 2009 fixeron que fose obxecto dunha ducia de preguntas parlamentarias no Parlamento Europeo, dúas peticións ante o mesmo Parlamento, varias queixas perante a Comisión e ata tres procedementos penais, incluíndo o que actualmente sigue en curso”.
A estratexia da UE, afirman, pretende achandar o camiño para unha nova vaga de minaría na Europa, procurando reducir os trámites ambientais e contrarrestar a oposición social á minaría destrutiva.
“Fronte a isto, os grupos asinantes reafírmanse no dereito das comunidades de dicir non aos proxectos mineiros e avisan que esta nova “febre metálica” non pode levar a ignorar ou tapar os enormes impactos que teñen explotacións como a de San Finx e que as administracións levan anos pasando por alto”.
Encabezan a lista de signatarios a Oficina Europea do Medio Ambiente (EEB, que agrupa 150 organizacións europeas), WWF e Amigos da Terra Europa, contando ademais co apoio dunha vintena de colectivos galegos.