O Goberno de Lugo critica a Xunta por delegar nos concellos as multas pola normativa covid após dúas sentenzas
As dúas sentenzas que anulan as multas do Concello de Lugo por incumprir as normativas relacionadas coa pandemia da Covid-19 demostran que a Xunta da Galiza se trabucou ao delegar nas Administracións locais para xestionar as sancións froito das restricións, defendeu onte o Goberno municipal.
Nun comunicado, o Executivo local que encabeza a rexedora Lara Méndez sinala que os fallos, do Xulgado Contencioso Administrativo número 1 de Lugo, "reafirman" a postura mantida polo Goberno lucense "desde o primeiro momento nesta materia".
"Un aspecto que lle trasladamos á propia Xunta, xa en decembro de 2020, cando lle remitimos o informe coas actas levantadas pola Policía Local até ese momento por infraccións á lei galega de Saúde, advertíndolle que aínda estando habilitado un dispositivo para tramitalas, non concordábamos col dítame emitido polo Consello Consultivo, ao entender que a titularidade era da Administración galega, como así o entendía tamén a asesoría xurídica municipal", sinalou o tenente da alcaldía, Miguel Fernández.
Ao tempo, salienta que xa transmitiran en decembro de 2020 á Xunta que “non concordábamos co ditame emitido polo Consello Consultivo”, e acusa o Executivo de “derivación indebida de funcións” nos Concellos, amais de impor obrigas "sen achegar ningún tipo de recurso", resolven.
Consecuencias da medida
O Goberno lucense asegura que para facer fronte á xestión administrativa das multas por normativa covid viuse na obriga de modificar fai un ano o contrato en vigor "para incrementar o cometido da empresa que presta colaboración na xestión administrativa e recadación de multas".
Cifran o custe desta medida en 58.080 euros anuais, a razón de 40 euros por cada boletín ou acta tramitada, e estiman nun millar as sancións por incumprimentos entre xuño de 2020 e febreiro de 2021, momento no que foi modificada a lei galega de Saúde.
Aseguran que, de todas estas, só se presentaron "unha ducia de recursos". Para elas, o Goberno local entende que a sentenza que anula as sancións por ser expedidas por unha administración non competente (a local) sentará precedente; pero non así para o resto das multas.
"Atendendo a este factor, o percorrido económico do ditame será, por tanto, escaso”, mais “non podemos esquecer que aos concellos actuar con responsabilidade e someternos ás consideracións do Consello Consultivo ocasionaranos, ademais, ter que repercutirlle ás arcas municipais os gastos derivados das custas procesuais", concluíu Fernández.