As lambetadas típicas de decembro, feitas na casa

Ninguén se pon de acordo nas datas para marcar o inicio dos festexos e decoración do Nadal. Para moitos probabelmente sexa a partir da ponte de decembro, outros agardan a mesma semana de noiteboa e pola contra están os que xa fechan Samaín pondo luces natalicias. Se seguimos a lóxica da tradición e da lingua debemos pensar que tradicionalmente se vén chamando ao mes que entra como mes de Nadal de igual modo que a este que fechamos, como o mes de Santos; así pois, desde o día 1 activamos mentalidade de Apalpador, agasallos e lambetadas, sobre todo, moitas lambetadas. Porque desta volta vimos con mentalidade moi doce e con ganas de vos abrir o apetito con ideas que non son para nada orixinais mais que agardemos que si sexan unha solución moi interesante. Queremos presentarvos a posibilidade de preparardes eses clásicos máis comerciais de Nadal na casa. E por que na casa, se iso é moi fácil de conseguir nos comercios? Pois porque nos fixamos en varias conversas tidas con diferentes amizades arredor das diferentes épocas do ano e chegamos á conclusión de que moitísimas persoas acaban aborrecendo moito antes as dozuras desta época que non as do Entroido, Samaín ou Pascua, por pór diversos exemplos. E cremos que isto se pode deber a que posibelmente sexa a etapa do ano en que se come máis doce comercializado. Cómpre reparar en que unha gran parte da poboación prepara orellas, filloas ou roscas na casa; porén, para os turróns ou polvoróns, acudimos ao mercado en masa. E mesmo algún susto temos levado cando xa comezamos a ver a publicidade disto en pleno setembro. Falamos, desde logo, de produtos moi rendíbeis a nivel económico. Xa, xa, mais haberá que pensar en como darlle unha volta a isto, aforrando e sobre todo, logrando unhas lambetadas máis naturais polo que convén pór mans á masa. Máis traballo, por suposto, mais os resultados son diferentes, como veredes. Un clásico. Mil marcas, algunha estrela no mercado e moitas variantes canto a recheos e texturas e con cada vez máis novidades. Un mundo que evolucionou moitísimo, desde aquelas barras case irrompíbeis até as opcións cremosas que hoxe podemos atopar. Na vosa cociña entra o que vós desexedes así que pensade que chocolate vos presta e uns ingredientes para namorar. Nós aquí seguimos unha combinación bastante conservadora pero que garante o éxito, con chocolate, arroz inchado un froito seco que non falla, as abelás. A dixestión, veredes que é bastante mellor. Tamén é certo, que doutra volta arriscamos cunha opción con leite condensada e conguitos e non envexou nada. Fixádevos canto podemos crear. Desde o máis clásico ao máis orixinal. Velaquí a grande sorpresa das creacións caseiras de Nadal. Hai produtos comerciais que son moi difíciles de imitar porque teñen un sabor moi preciso e diferenciado mais tamén existen outros que viven de que non exploramos a elaboración na casa porque senón quedan sen compradores. Os mazapáns caseiros viven nunha dimensión moi superior. Sabor puro a améndoa, textura máis crocante... e ollo, neste caso, elaboración supersinxela! Esta, si ou si, por favor! Icona número 1 das sobremesas do Nadal. Pouca casa haberá sen polvorón. Limón, canela, abelá, chocolate... Tamén aquí, como no turrón, un campo en expansión en canto a sabores e que nos leva a que cada un da familia procure a súa opción. E... reparastes na posibilidade de os cociñardes no día antes e vos despreocupar de que se acaban os vosos favoritos? Pois aquí, que somos moi chocolateiros e viamos que sempre se esgotaban nas semanas chave, preparamos por fin os polvoróns de chocolate na casa. Presentan talvez unha textura algo máis densa mais tamén un sabor moito máis natural e intenso que ofrece un bo cacao. Vimos con mentalidade moi doce e con ganas de vos abrir o apetito con ideas que non son para nada orixinais mais que agardemos que sexan unha solución interesante Temos mil opcións pendentes para desenvolver toda a creatividade. Calma, non queremos enganar ninguén. En moitas ocasións o preparado destes produtos é case que intuitivo e moi veloz como nos casos anteriores mais noutros casos responde á afección de cociñar, ter tempo e gozar da propia elaboración. Ese é o caso da sobremesa italiana que gaña espazo na nosa cultura a unha velocidade realmente elevada. Como dicimos, aquí si se precisa un chisco de tempo para preparar o panettone. De non telo, pois poderedes ir tirando co do súper. Agora ben, no caso de que o elaboredes, preparade o padal porque ides descubrir un mundo de fantasía culinaria. Como se di cos produtos da horta... nada que ver! Unha esponxosidade e frescura sorprendentes e un sabor que engancha. Para probar! E para rematar, máis chocolate. Pura dozura natalicia. Aquí todos temos un par de marcas que dominan o mercado e que nos veñen á cabeza. Son sabores difíciles de imitar neste caso mais aquí tiramos do orgullo desa creatividade que tanto adoramos na cociña. Ademais, esta receita é para tirar proveito todo o ano, ou canto menos todo o inverno. E ollo, que todo o mundo está esperando esas marcas. E se sorprendemos coas nosas creacións caseiras? Velaquí un par de ideas, por un lado mesturando dous chocolates e coa cremosidade da crema de cacao, e por outro, procurando lograr esa combinación marabillosa de chocolate e abelá. A estética custa mimetizala, claro, mais seguimos insistindo en que canto a sabor saímos gañando sempre! Non sabemos que tal se ha portar o Apalpador mais vós por se acaso, ide preparándovos as vosas doces homenaxes, que ben o merecedes. Tedes estas creacións e outras moitas en Bolboretas no bandullo.