O incendio de Lobios no que faleceu un piloto segue activo e afecta xa a 350 hectáreas
O incendio que afecta desde as 8 horas deste sábado a unha zona do Parque Natural Baixa Limia - Serra do Xurés en Lobios, comarca de Ourense, segue activo e queimou xa unha superficie de 350 hectáreas, de acordo coas últimas estimacións comunicadas pola Consellaría do Medio Rural este domingo. Nos labores de extinción deste lume estrelouse o sábado un hidroavión do dispositivo portugués, o que causou a morte dun dos tripulantes e feridas graves ao outro.
As chamas comezaron na parroquia de Manín e afectan a unha zona moi próxima á fronteira co país veciño. Até o momento traballaron para a súa extinción un técnico, oito axentes, 19 brigadas, oito motobombas, dúas pas, nove avións e nove helicópteros. Ademais, participan xa efectivos da Unidade Militar de Emerxencias (UME).
Este non é o único incendio sen extinguir que afecta á zona do parque natural. En Muíños está estabilizado desde as 00.43 horas do sábado un incendio que queimou 50 hectáreas na parroquia de Requiás. As chamas comezaron na tarde da sexta feira nunha zona na que quedaran extinguidos outros dous lumes a madrugada anterior.
Para a súa extinción mobilizáronse até o momento cinco axente, 19 brigadas, 11 motobombas, unha pa, nove avións e sete helicópteros.
Tamén afecta a terreos incluídos no Parque Natural Baixa Limia - Serra do Xurés un incendio que empezou na madrugada da sexta feira en Lobeira e que está controlado desde as 23.14 horas dese mesmo día.
Neste caso, a zona afectada está na parroquia de Fraga e ocupa unhas 30 hectáreas de monte raso. Para o seu control mobilizáronse oito axentes, 18 brigadas, 10 motobombas, unha pa, catro avións e dous helicópteros.
Estabilizado o incendio de Toén
O incendio que queimou unhas 250 hectáreas en Toén está estabilizado desde as 20.14 horas do sábado. As chamas comezaron na parroquia de Moreiras na tarde da sexta feira e para a súa extinción traballaron dous técnicos, 13 axentes, 34 brigadas, 25 motobobas, tres pas, 12 avións e nove helicópteros, ademais de profesionais da UME.
Pola súa banda, segue controlado desde as 19.06 horas do sábado o lume que queimou 95 hectáreas en Navia de Suarna, na parroquia de Son. Empezou o venres pola noite e para o seu control mobilizáronse ata o de agora un técnico, oito axentes, 26 brigadas, 16 motobombas, unha pa e un helicóptero.
Extinguido o de Lousame
Por último, Medio Rural informou de que se deu por extinguido o incendio que afectou á parroquia de Tállara, en Lousame, ás 23.41 horas deste sábado.
Este lume, que comezou na madrugada dese mesmo día en dous focos simultáneos, afectou a 51,58 hectáreas, das que 27,58 son de monte raso e 24, de arboledo. Mobilizáronse en total nove axentes, 19 brigadas, 14 motobombas, dúas pas, un avión e dous helicópteros.