O incendio de Larouco, con 20.000 hectáreas queimadas, supera o de Chandrexa e pasa a ser o maior da historia da Galiza
O incendio que permanece activo no concello de Larouco (comarca de Valdeorras), que cruzou o Sil por varios puntos até pasar á provincia de Lugo, bateu esta segunda feira un tráxico récord, superando a superficie queimada en Chandrexa de Queixa e converténdose, con 20.000 hectáreas arrasadas polo momento, no maior incendio forestal da historia da Galiza.
Segundo os datos feitos públicos a última hora desta segunda feira pola Consellaría do Medio Rural, a provincia de Ourense segue sendo a máis afectada polos incendios, e nela arderon a maior parte das máis de 70.000 hectáreas de terreo calcinadas até o de agora nesta vaga de lumes. Os satélites duplican as hectáreas calcinadas nos incendios que notificou a Xunta: máis de 125.000
Esta crise incendiaria converteuse, cos datos da Consellaría, xa na segunda vaga de incendios máis grande na Galiza, só por detrás dos incendios que arrasaron máis de 95.000 hectáreas no ano 2006. A superficie afectada polos incendios en 2017, outro ano tráxico para os montes galegos, foi de máis de 60.000 hectáreas.
No último parte informativo da Consellaría do Medio Rural, infórmase de que permanecen activos nove incendios forestais na provincia de Ourense, mentres que outros dous están 'estabilizados' e outro máis, o de Verín-Mourazos, deuse por extinguido.
As medidas de protección á cidadanía seguen vixentes nas zonas afectadas polos incendios forestais e permanece activada a situación 2 de alerta. Con todo, nas últimas horas non houbo novas evacuacións e levantouse o confinamento no fogar residencial de maiores e a vivenda comunitaria de Carballeda de Avia.
Así, o lume máis grave é o que se iniciou a pasada cuarta feira en Larouco, na parroquia de Seadur, e que segundo as últimas estimacións xa afecta unhas 20.000 hectáreas, converténdose no máis grande da historia da Galiza. As chamas afectan, ademais, a outros nove concellos da zona: Quiroga, O Barco de Valdeorras, O Bolo, Carballeda de Valdeorras, A Rúa, Petín, Rubiá, A Veiga e Vilamartín de Valdeorras.
Por outra parte, tamén segue activo o incendio de Chandrexa de Queixa iniciado na parroquia de Requeixo o día 8 de agosto, e que acabou uníndose con outros dous incendios rexistrados na parroquia de Parafita e no municipio de Vilariño de Conso. Este incendio está a afectar tamén aos municipios de Manzaneda, Montederramo, A Pobra de Trives, O Bolo e Laza.
Igualmente, seguen activos o incendio de Oímbra (que se iniciou o 12 de agosto e días despois uniuse cun lume declarado en Xinzo dá Limia e estendeuse a outros municipios), con 15.000 hectáreas arrasadas, tamén no 'top' dos máis grandes grandes da Galiza; o da Mezquita (que afecta tamén o municipio da Gudiña e ao de Viana do Bolo, así como a parte da provincia de Zamora), con 10.000 hectáreas afectadas; e o de Maceda (que tamén afecta a Vilar de Barrio), cunha superficie queimada de 3.500 hectáreas.
