O cheque de 200 euros anunciado polo Goberno español exclúe os beneficiarios do IMV e outras prestacións
Os fogares beneficiarios do ingreso mínimo vital (IMV) ou dalgún tipo de pensión non poderán acceder ao cheque de 200 euros aprobado esta terza feira polo Goberno español. O texto do decreto, publicado esta cuarta no BOE, determina que esta axuda serve para "paliar situacións de vulnerabilidade económica non cubertas por outras prestacións de carácter social", como as antes mencionadas.
No texto especifícase así que non poden acceder a estas axudas quen cobren o IMV ou perciban pensións abonadas polo Réxime Xeral e os Réximes especiais da Seguridade Social ou polo Réxime de Clases Pasivas do Estado. Tampouco quen perciba prestacións análogas ás anteriores recoñecidas aos profesionais non integrados no Réxime Especial da Seguridade Social dos Traballadores por Conta Propia ou Autónomos polas mutualidades de previsión social que actúen como alternativas ao réxime especial da Seguridade Social mencionado. "Sempre que se trate de prestacións por situacións idénticas ás previstas para a correspondente pensión da Seguridade Social", di o texto.
Do mesmo modo, quedan excluídas do dereito a esta axuda, independentemente da valoración do patrimonio neto, as persoas beneficiarias individuais cando, durante 2022, fosen administradoras de dereito dunha sociedade mercantil que non cesase a súa actividade a 31 de decembro de 2022, ou fosen titulares de valores representativos da participación en fondos propios dunha sociedade mercantil non negociados en mercados organizados.
Pola contra, o decreto sinala que esta axuda de 200 euros diríxese a quen fosen asalariados, autónomos ou desempregados en 2022, que teñan un máximo de ingresos —27.000 euros anuais—, e de patrimonio conxunto —de 75.000 euros— en función da convivencia no domicilio. Neste último caso calcúlase descontando a vivenda principal, no caso de ser da propiedade dos beneficiarios.
Aliás, este cómputo de ingresos e patrimonio realizarase con data 31 de decembro. En caso de matrimonio ou parella de feito, será o cómputo conxunto, así como o dos menores e ascendientes que residan no mesmo fogar. Para ser beneficiario, tamén se debe ter a residencia habitual no Estado español a 31 de decembro.
Como solicitar o cheque de 200 euros?
Tal e como explica o Goberno no decreto, quen queira acceder a esta axuda deberán presentar a súa solicitude na sede electrónica da Axencia Estatal de Administración Tributaria, enchendo o formulario electrónico que estará ao dispor da cidadanía desde o 15 de febreiro até o 31 de marzo de 2023. No mesmo disponse que deberá figurar necesariamente a conta bancaria do titular da solicitude na que se desexe que se realice o abono, xa que estes 200 euros recibiranse mediante transferencia bancaria nun pagamento único.
O decreto especifica, ademais, que no caso de que a solicitude sexa rexeitada, notificarase ao solicitante unha proposta de resolución denegatoria, na que se lle indicarán os datos necesarios para consultar os motivos da denegación na sede electrónica da Axencia Estatal de Administración Tributaria. Entón, o solicitante disporá dun prazo de dez días, a contar desde o día seguinte á notificación da proposta de resolución denegatoria, para alegar e presentar os documentos e xustificantes que considere pertinentes.
Segundo explica o Executivo, transcorrido un prazo dun mes, a contar desde o día seguinte á notificación da citada proposta, sen a presentación de alegacións, documentos ou xustificantes, producirase a finalización do procedemento nos termos da proposta denegatoria, sen necesidade de resolución expresa da Administración.
E, transcorrido o prazo de tres meses desde a finalización do prazo de presentación da solicitude sen efectuarse o pago nin notificarse unha proposta de resolución denegatoria, a solicitude poderá entenderse desestimada. Contra esta desestimación presunta poderase interpor recurso de reposición e reclamación económico-administrativa, nos termos previstos na Lei Xeral Tributaria.