O imprescindíbel de 2021, no Anuario de ‘Nós Diario’
‘Nós Diario’ chega este sábado acompañado dunha publicación especial: o Anuario 2021. Máis de 100 páxinas a cor cunha escolma das pezas máis representativas do ano e con dez análises de diversas temáticas realizadas por persoas expertas, en exclusiva, para esta publicación.
Trátase dun Sermos Galiza especial, de máis de 100 páxinas a cor, cunha escolma dos contidos xornalísticos máis significativos do ano, tanto pola súa relevancia como por seren representativos ou exclusivos de Nós Diario.
Desde as mobilizacións con motivo do 8 de marzo, pasando polo escándalo dos bebés roubados durante o franquismo, os xuízos pola caixa B do Partido Popular, os favores do Goberno galego a grandes empresas eólicas... E tamén a burbulla eólica, o aproveitamento hidroeléctrico, a anulación da prórroga da concesión de Ence, a falta de vivendas en alugueiro, as dificultades para abortar na sanidade pública...
A información viral sobre Siri e o galego, os orzamentos de 2022, as irregularidades detectadas na concesión da AP-9, a expatriación do aforro galego... E fotografías, entrevistas, contidos de internacional, de deportes... E moito máis. Todo isto vén recollido no Anuario, que incorpora dez artigos de análise en exclusiva para esta publicación.
Dez artigos de análise en exclusiva
Entre as pezas publicadas atópase a de Xoán Antón Pérez-Lema, avogado e analista político, que ofrece a súa visión ao redor da política nacional ao longo deste ano. Xulio Ríos, presidente de honra do Instituto Galego de Análise e Documentación (IGADI), fará o propio coa política internacional, con especial énfase nas tensións entre a China e os EUA.
O doutor en Ciencias Económicas Albino Prada ofrece unha radiografía en relación á pegada de 2021 na economía e expón as perspectivas para o futuro próximo, mentres que a doutora en Ciencias Económicas e Empresariais María do Carme García Negro revisa o ano desde o punto de vista do mundo do traballo.
Míriam Couceiro, escritora e socióloga, pon o foco na igualdade e nos puntos de debate candentes na esfera dos feminismos, mentres que o presidente de Adega, Roi Cuba, atende aos retos do ecoloxismo para o próximo ano, non sen antes facer un percorrido sobre o que deixa tras de si 2021 en relación ao medio ambiente e, de maneira singular, a respecto da proliferación de proxectos eólicos.
Ademais, a escritora e xornalista Montse Fajardo analiza o ano en relación á memoria, mentres que o lingüísta e doutor en Filoloxía Xosé Ramón Freixeiro Mato ofrece un resumo do que foi 2021 para a lingua galega.
Rocío Castro, xornalista especializada en cultura, é a encargada de repasar os fitos culturais de 2021, mentres que a atleta e profesora da Universidade de Vigo Alba Cuba pon a ollada nos logros deportivos deste ano que remata e nos retos que o deporte galego ten por diante.
Máis de 100 páxinas a cor de Anuario, á venda con Nós Diario, este sábado 18 de decembro por só 3 euros. Bule ao quiosco!
Súmate desde menos de 0,60 euros
Nós Diario é posíbel grazas ás máis de 3.000 persoas subscritoras. Faite asinante por menos de 0,60 euros ao día. Tamén podes contribuír con Nós Diario facéndote mecenas ou expresando a túa amizade co proxecto cunha doazón.