A III Marcha pola Memoria das Encrobas xunta máis de 200 persoas
A mobilización, conformada por veciñanza, axentes sociais e artistas, reclamou un futuro digno e respectuoso co medio e cos veciños e veciñas a carón da central térmica de Meirama. A xornada estivo marcada pola lembranza da loita cidadá a través do encontro e da arte, así como pola necesidade de a manter no presente contra os diferentes proxectos de espolio medioambiental vivos no país.
A aldea da Lousa acolleu o pasado domingo 29 de setembro a III Marcha pola Memoria das Encrobas, na que participaron artistas, axentes sociais e representantes de plataformas cidadás medioambientais de diferentes puntos do país. Máis de 200 persoas acudiron a un evento de carácter lúdico-reivindicativo arredor da memoria das loitas labregas contra a ocupación das terras por parte de Unión Fenosa.
O acto contou cos versos das poetas Patricia Cambón, Ramiro Vidal e Laura Rei Pasadín, aos que se uniron os de María Rodríguez, natural das Encrobas, en boca das propias veciñas. A parte musical veu da man de Xosé Luís Rivas (Mini), Zeltia Irevire e Peter Brea, así como das pandeireteiras das Encrobas, agrupacións musicais da Pontraga, o Reverendo Can e os Gaiteiros de San Martiño.
Loita viva
Após 42 anos dos primeiros enfrontamentos entre o pobo e a Garda Civil, non se trata só de lembrar o acontecido. O exemplo do pasado lévanos cara ao futuro, como demostra a Rede de Plataformas Medioambientais Compostela-Ulla-Tambre, cuxos representantes alzaron de novo o berro de “aire, auga e terra limpas” contra os diferentes proxectos empresariais agresivos co territorio (megaminaría, eólicos en lugares non axeitados, vertedoiros irregulares...) que comprometen o futuro económico e social de Galiza.
As persoas participantes incidiron especialmente na necesidade de lembrar as ocupacións e como as expropiacións da contorna se levaron a cabo, reclamando que siga viva a loita polos dereitos da xente da Lousa, sobre todo ante a incerteza que trae o peche da central térmica e a ameaza de novos proxectos industriais que poderían afectar a comarca, considerada pola plataforma Salvemos a Comarca de Ordes como un “territorio de sacrificio”.