O garda civil que matou a súa ex parella en Oia quedara libre sen xuízo por falta de informes, mais con orde de afastamento

O garda civil que asasinou cunha arma de fogo a súa ex parella en Oia (Baixo Miño), e que se suicidou logo de tentar fuxir das autoridades após perpetrar o crime, fora posto a disposición do Xulgado de Violencia sobre a Muller de Vigo o pasado mes de abril. Aquilo sucedeu tras a súa detención por unha denuncia interposta pola vítima e o xulgado acordou a súa posta en liberdade, alén de decretar unha orde de protección para a muller.

Segundo precisan fontes do Tribunal Superior de Xustiza da Galiza (TSXG), nese momento non decorreu ningún xuízo rápido contra o denunciado, xa que a vítima relatara dous episodios de violencia machista e o xulgado non dispuña dos informes necesarios. Con todo, si se lle prohibira achegarse ou comunicarse coa súa ex parella, Ana Vanessa Serén. "Nunca estivo previsto. Polas circunstancias do caso non podería ser un xuízo rápido, porque a vítima denunciou dous feitos separados e para poder realizar un xuízo rápido, este e calquera outro, toda proba ten que estar fechada e a disposición do xulgado", precisan fontes do TSXG.

As mesmas fontes explican que o xulgado de Vigo inhibiuse en favor do xulgado de instrución número 1 de Tui, que leva asuntos de Violencia sobre a Muller, ao residir a vítima no territorio que abrangue estoutro partido xudicial. No xulgado tudense incoáronse dilixencias e requiriuse á muller para que achegase o parte de lesións que faltaba, documentación que foi achegada o pasado 23 de maio, e remitida ao día seguinte ao Instituto de Medicamento Legal da Galiza (Imelga).

Por outra parte, trasladan fontes xudiciais, a letrada de Ana Vanessa solicitáralle ao xulgado de Tui o 23 de maio que a muller puidese acceder ao domicilio do investigado para poder recoller as súas pertenzas. O xuíz acordouno ao día seguinte, indicando que iría auxiliada por axentes das Forzas e Corpos de Seguridade do Estado "para garantir a súa seguridade".

O crime

O asasinato perpetrouse á primeira hora da tarde do sábado, cando o denunciado, un garda civil que non dispuña de arma regulamentaria —após retirárselle o permiso despois dunha baixa médica—, presentouse no acceso do cámping 'O Muíño' de Mougás (Oia), onde traballaba a vítima. Cando a muller saíu, disparoulle e matouna, e saíu fuxindo.

O sospeitoso foi localizado horas despois nunha zona forestal e, ao verse cercado por axentes, suicidouse. O Concello de Oia decretou tres días de loito oficial e, ao longo desta segunda feira, sucédense por toda Galiza senllas concentracións de repulsa por estes feitos en diferentes cidades e vilas.

A subdelegada do Goberno estatal en Pontevedra, Maica Larriba, explicou nas últimas horas que os axentes da unidade da Garda Civil encargados deste tipo de casos interviran nun total de 56 ocasións para protexer á vítima, unha delas "moi recentemente". En todo caso, segundo explicou, isto non quere dicir que o agresor incumprise esta pena, senón que se trata de "seguimento da vítima para constatar que a persoa condenada non está a quebrantar a condena", e aseverou que "en ningún caso" a vítima "estivo desamparada".

Este é o segundo asasinato machista rexistrado na Galiza no que vai de 2023, despois de que un home fose detido en febreiro pasado após matar a súa ex parella, Beatriz Lijó, en Baiona (comarca de Vigo), diante dos seus propios fillos.