A Garda Civil sinala o exceso de velocidade como causa do accidente mortal de Noiteboa malia as denuncias polo estado da N-541
A investigación da Garda Civil concluiu que o exceso de velocidade foi o principal causante do accidente de autobús rexistrado en Cerdedo-Cotobade a noiteboa de 2022 no cal faleceron sete persoas ao sufrir unha saída de vía e precipitarse ao río Lérez desde o viaduto de Pedre, na nacional N-541.
Así o trasladou esta quinta feira o delegado do Goberno español na Galiza, Pedro Branco, que sinalou que o informe elaborado polos especialistas do Equipo de Reconstrución de Accidentes de Tráfico (ERAT) xa foi entregado ao xulgado número 1 de Pontevedra, encargado da investigación do tráxico sinistro no que morreron sete pasaxeiros e só houbo dous sobreviventes, o condutor e outra viaxeira.
"O resultado da investigación e do informe técnico xa obran en poder do xulgado e apuntan a que a causa fundamental do accidente foi un exceso de velocidade", trasladou Branco nunhas declaracións difundidas esta quinta feira pola Delegación do Goberno español.
Nestas mesmas declaracións, o representante do Executivo estatal no país tamén afirma que o exceso de velocidade foi o motivo do sinistro no cal, semanas despois do accidente de autobús, un motorista faleceu a poucos quilómetros do viaduto de Pedre cando circulaba pola N-541.
Os feitos
O tráxico suceso produciuse na noite do 24 de decembro, cando, nunha xornada de intensas precipitacións en toda a Galiza, o autobús que cubría a liña Lugo-Vigo precipitouse ao río Lérez desde unha altura de 29 metros tras saírse da vía na ponte de Pedre, onde, nove meses despois, aínda pode verse a desfeita causada polo vehículo na varanda do viaduto.
Días despois, un equipo especializado da Garda Civil desprazouse a Cerdedo-Cotobade desde Madrid para analizar sobre o terreo a zona do sinistro para, a partir destes datos solicitados con drons e equipos láser aos que sumaron a información do autobús e os seus equipos, elaborar un informe pericial sobre as posíbeis causas.
A este informe incorporouse tamén a versión dos dous sobreviventes, unha viaxeira e o condutor, que prestou declaración na comandancia da Garda Civil de Pontevedra en calidade de investigado.
"Prudencia"
"Apelamos á prudencia dos condutores e tamén á prudencia dos representantes públicos cando se avanzan declaracións ou hipóteses sen ter toda a información", sentenciou Pedro Branco esta quinta feira, un día despois dun novo encontro dos sete alcaldes agrupados no denominado 'Pacto de Pedre' co que reclaman ao Goberno central investimentos para mellorar as condicións de seguridade na nacional N-541.
Os rexedores de Cerdedo-Cotobade, O Carballiño, O Irixo, Beariz, Boborás, Maside e Punxín volveron escenificar a pasada cuarta feira a súa unidade en demanda dunha actuación integral na estrada nacional que une as capitais de Ourense e Pontevedra e que, segundo aseverou o rexedor de Cercedo-Cotobade, Jorge Cubela, converteuse nun "cemiterio" polas súas deficiencias de conservación.
Os alcaldes vincularon a deterioración na capa de rodadura da vía cos "numerosos" accidentes que se producen nela, entre os que citaron o sinistro de autobús de noiteboa e o do motorista falecido semanas máis tarde.