A Galiza rexistrou un mes de xullo "moi seco" no que atinxe ás precipitacións e "extremadamente cálido" en canto ás temperaturas, cunha vaga de calor histórica entre os días 11 e 15, segundo conclúe o avance do último informe climatolóxico de Meteogalicia.
Con datos recollidos nas once estacións meteorolóxicas representativas do país, a anomalía media da temperatura do mes pasado foi de +2,7 graos centígrados. Neste senso, as temperaturas máximas foron de media 3,9 graos superiores ao habitual, mentres que as mínimas ficaron 1,54 graos por riba. "Tanto nas máximas como nas medias a anomalía en xullo foi a máis elevada da serie desde 1981", asegurou a Xunta nun comunicado.
En concreto, o valor medio das temperaturas máximas foi de 28,1 graos, rexistrándose as máis altas nas ribeiras do Sil, no Miño ourensán e na comarca de Verín, con cifras próximas aos 36 graos. Pola contra, os valores máis baixos déronse na Mariña e na comarca de Ortegal, con datos próximos aos 18,9 graos.
A respecto das temperaturas mínimas, o valor medio de toda a Galiza foi de 14,6 graos, rexistrándose os máis baixos na comarca da Limia, con 8,4 graos, e os máis altos nas localidades do Condado e a comarca de Vigo, onde chegaron aos 18,9 graos.
Choivas escasas
No apartado de precipitacións, en xullo rexistrouse 66% menos que a media do valor climático normal, cunha repartición "moi desigual". As máis importantes producíronse durante a mañá do día 3 e na tarde-noite do 14, mais non afectaron por igual o conxunto do país.
"Algúns lugares quedaron con precipitacións moi escasas ou mesmo nulas e outros puntos achegáronse á normalidade ou mesmo foron húmidos", explicou a Xunta, que sinalou Vigo e O Condado como zonas nas que non se rexistraron choivas o mes pasado.
"A gran anomalía positiva nas temperaturas e a escaseza de precipitacións teñen a súa explicación nas altas presións, que foron predominantes durante xullo, impedindo a chegada de influencias atlánticas e allegando masas de aire moi cálido procedentes do norte de África e do sur da península Ibérica", engadiu.