Galiza supera o milleiro de vítimas polo coronavirus após unha xornada con 21 decesos

Fontes da Consellaría de Sanidade informaron hai uns minutos do falecemento de 21 persoas afectadas pola Covid-19. Este número tan elevado de falecementos fai que Galiza superara xa a fronteira do milleiro de vítimas desde que comezou a pandemia. 

Estes decesos, que igualan en número aos producidos a pasada segunda feira 2 de novembro, fan que a cifra total de pasamentos estea nas 1.009 galegas e galegos.

No entanto, as autoridades sanitarias advertiron que nestes 21 decesos contan tamén aquelas doentes finadas durante a fin de semana e que aínda non entraran nas listaxes de danos do virus. Cando menos oito das e dos afectados, residían en xeriátricos de toda Galiza, pero aínda falta que a consellaría concrete algúns datos.

Os pasamentos decorreron por todo o país, dándose catro no Complexo Hospitalario Universitario da Coruña (Chuac). Alí faleceron dous homes de 84 anos, outro de 82 e outro de 98 anos de idade.

No caso de Lugo, non se puido facer nada por salvar a un usuario de 60 anos da residencia Vivenda Comunitaria Remanso de Paz da Fonsagrada que estaba ingresado no hospital da cidade. En Pontevedra, neste caso no CHOP, rexistrouse a morte dun enfermo de 68 anos.

Nas propias residencias

Sanidade informou de dous falecidos no centro hospitalario de Ourense: ambos os dous, unha muller de 87 anos e un home de 85, procedían de residencias. En concreto unha era usuaria de Nosa Señora dos Miragres de Barbadás, que xa leva padecido moitas baixas, e outro dos Gozos de Pereiro de Aguiar. Así mesmo, en Barbadás, nas propias instalacións, perdeu a vida un varón de 72 anos.

Vigo foi a área sanitaria máis afectada, con até oito finados. Catro persoas finaron no Complexo Hospitalario Universitario de Vigo (Chuvi) -unha muller de 91 anos e tres homes de 78 (usuario do centro residencial de Salvaterra do Miño), 83 e 86 anos. Xa no propio xeriátrico faleceron outras tres usuarias e usuarios de 85, 91 e 91 anos.