A Galiza rexistrou no inverno a menor cantidade de precipitacións da década
A Galiza rexistrou este inverno a menor cantidade de precipitacións da última década, segundo o informe elaborado por Meteogaliza —entidade dependente da Consellería de Medio Ambiente— a respecto do inverno climatolóxico, con datos de decembro, xaneiro e febreiro. Así, hai que remontarse a 2012 para atopar rexistros de choiva tan baixos como os do inverno 2021-2022.
A porcentaxe de precipitacións foi 37% máis baixa que a do período de referencia. O mes de decembro estivo marcado por dúas borrascas, que permitiron recoller unha media de 186 litros por metro cadrado (3% máis) nas principais estacións do país.
Con todo, a partir do 10 de xaneiro a situación mudou, e instaláronse o anticiclón e a estabilidade até o remate do período. Segundo Meteogaliza, tanto xaneiro como febreiro foron meses "moi secos" e, no caso de febreiro, o déficit hídrico alcanzou 67%, polo que se converteu no febreiro máis seco da década, só por detrás de febreiro de 2012.
Os valores de precipitacións máis baixos concentráronse no sur da circunscrición de Lugo e en gran parte da de Ourense, especialmente na comarca de Valdeorras, onde só se rexistraron 79 litros por metro cadrado entre decembro e febreiro. As excepcións marcáronas os municipios de Navia de Suarna e Negueira de Muñiz, con choivas 93% por riba do normal.
Temperaturas
O informe de Meteogaliza tamén constata que o trimestre foi cálido, especialmente tendo en conta as temperaturas de decembro que, tanto nas máximas como nas mínimas, estiveron en valores moi elevados durante case todo o mes, cunha media de 10,8 graos centígrados (máis de 2ºC por riba dos valores habituais).
O ano 2022 mantivo eses rexistros, aínda que as maiores anomalías se detectaron nas temperaturas máximas, "extremadamente cálidas" para esta época do ano. Pola contra, as mínimas de xaneiro foron frías.
A respecto do mes de febreiro, mantívose o predominio anticiclónico, e tamén se tratou dun mes cálido, cun incremento da temperatura media de 0,9 graos.
E no tocante á distribución xeográfica, as temperaturas tiveron comportamento desigual. Deste modo, a media do inverno climatolóxico no conxunto do país foi de 8,7 graos (1,15 graos por riba do esperado), mais en Manzaneda esa media quedou en 2,7 graos, mentres que en gran parte do litoral de Pontevedra superáronse os 13 graos de media.