Galiza rexistra a maior caída de nacementos do Estado no primeiro trimestre de 2025, un 5% menos

A Galiza rexistrou un total de 3.163 nacementos no primeiro trimestre de 2025, un 4,96% menos que no mesmo período de 2024, o que supón a maior caída relativa do Estado español, segundo os datos publicados esta cuarta feira, 21 de maio, polo Instituto Nacional de Estatística (INE)..

Este descenso é superior a 3,8% de baixada que anotan tanto Cantabria como Nafarroa até marzo, segundo os datos provisionais divulgados. O descenso da media estatal é de 0,5%, cun total de 78.014 nacementos. Así, o conxunto do Estado non supera os 30.000 nacementos mensuais desde outubro de 2021.

Polo que se refire só ao mes de marzo, os nacementos na comunidade galega foron 1.079, un 6,8% menos que os 1.158 dun ano antes. Por idades das nais en marzo, o maior grupo é o de 35 a 39 anos (347), seguido de 30 a 34 anos (322). Houbo 164 proxenitoras de 40 ou máis anos, incluídas tres mulleres de 50 ou máis anos.

Defuncións

O INE tamén publica esta cuarta o avance de datos provisionais de defuncións, neste caso dos catro primeiros meses, con 12.489 mortes rexistradas na Galiza, un 1% menos que no mesmo período de 2024.

Segundo a estimación de defuncións nas 18 primeiras semanas de 2025, faleceron no Estado español 165.374 persoas, 2.064 máis (un 1,3% máis) que no mesmo período de 2024, a cifra máis alta rexistrada nesas semanas desde 2022.