A Galiza recompilará o xenoma de 400.000 galegos e galegas

A Galiza  porá en marcha unha iniciativa "pioneira" no Estado coa que recompilará o ADN de 400.000 galegos e galegas co obxectivo de contar cunha base de datos coa que identificar posíbeis variantes de risco en patoloxías como cancro de mama ou hipercolesterolemia familiar e, deste modo, poder adiantarse a diagnósticos ou tratamentos.

A iniciativa, denominada 'Proxecto Xenoma Galiza' e que conta cun orzamento de 20 millóns de euros, foi presentada na sede da Fundación Pública Galega de Medicamento Xenómica con presenza do director desta entidade, o doutor einvestigador Ángel Carracedo. 

O proxecto consistirá na chamada a participar de forma voluntaria a 400.000 galegos e galegas con idades comprendidas entre os 35 e 65 que serán seleccionados de forma aleatoria para recoller mostras do seu xenoma.

A partir delas levarán a cabo cribados específicos que, nunha primeira fase, buscarán alteracións xenéticas asociadas ao cancro de mama e ovario de carácter hereditario, a síndrome de Lynch e a hipercolesterolemia familiar.

No caso de que un dos pacipantes presente unha variante xenética de alto risco, someterase a unha segunda proba coa que confirmar, previo paso á entrada no sistema e ofreceráselle vixilancia ou tratamento, en función do que determine o criterio clínico.

Estudo do ADN

O obxectivo, como explicou o doutor Carracedo, é contar con máis información dos pacientes a partir do estudo do seu ADN para, cruzándoo coa súa historia clínica, ter capacidade de adiantarse á aparición de enfermidades en persoas que teñen predisposición por razóns xenéticas a padecer determinadas doenzas.