Galiza recibirá esta semana 30.000 doses da vacina de AstraZeneca
O Ministerio de Sanidade confirmou á Xunta da Galiza o envío de 30.000 doses de AstraZeneca a finais desta semana.
A ministra española de Sanidade, Carolina Darias, trasladou ao seu homólogo na Xunta, Julio García Comesaña, o envío de perto de 30.000 doses da vacina de AstraZeneca á Galiza a finais desta semana.
Así llo trasladou no marco da reunión do Consello Interterritorial do Sistema de Saúde, tras o que Sanidade destacou que este novo envío permitirá avanzar no proceso de vacinación e acelerar o ritmo á hora de administrar as doses.
En suma, a Galiza ten administradas un total de 233.316 doses, das que 184.620 son do laboratorio de Pfizer, 6.367 de Moderna e 42.329 de AstraZeneca.
Tres novos falecementos
Esta cuarta feira, 3 de marzo, as autoridades sanitarias informaron de tres novos falecementos na Galiza a causa da Covid-19, co que se eleva o total de vítimas da pandemia no país a 2.259 casos.
Dous deles rexistráronse na terza: dous homes de 80 e 79 anos que se atopaban ingresados, respectivamente, no Hospital do Salnés e no Complexo Hospitalario Universitario de Santiago.
O terceiro falecido foi un home de 91 anos que tamén se atopaba ingresado no CHUS compostelán. Os tres presentaban patoloxías previas, engaden desde Sanidade