Galiza non esquece Palestina: denuncia tres meses de "apagamento informativo" e un acordo de paz sometido á axenda de Trump
Centos de persoas manifestáronse esta segunda feira en máis de 40 localidades galegas para expresar a súa solidariedade con Palestina tres meses despois de que se asinase un acordo de paz para os territorios ocupados que "non é real".
O xenocidio continúa, pero "silenciado". "Hai unha gran campaña activa por parte dos grandes medios de comunicación e dos gobernos occidentais para manter oculto o que acontece en Palestina tres meses despois de que se asinase aquel vergoñento documento en Exipto", denuncia en declaracións a Nós Diario Óscar Valadares, voceiro de Mar de Lumes. "O seguimento mediático apagouse e dáse a idea de que tras a chegada de Donald Trump co seu plan Palestina ou non existe ou está en paz, cando está igual ou peor".
Todos os focos e ducias de líderes mundiais rodearon a sinatura dun acordo que fixa até tres fases para un cesamento do fogo que non se produciu. E son só iso, remarca Valadares, cada etapa do pacto fica sometida, "non aos intereses de Palestina, senón aos intereses israelís e á axenda que marca o presidente Trump. 'Se me interesa máis isto, facémolo agora, mais se estou ocupado invadindo outro país, bombardeando Nixeria ou secuestrando o presidente de Venezuela, pois que esperen os palestinos'", o "colmo" do "salvaxismo das relacións internacionais".
As mobilizacións pro Palestina que esta segunda feira se desenvolveron en vilas e cidades tamén censuraron a "persecución crecente" de militantes e activistas "para sementar a preocupación e o medo". Asegura Valadares que o Estado Español ten varias persoas denunciadas e con procesos abertos que as obriga a pasar polo sistema xudicial, "por acción na Volta ciclista ou en establecementos comerciais que manteñen lazos con Israel".
Un dos últimos e máis soado é o caso de Bruno Lopes Teixeiro, na comarca de Ferrol, "ao que lle piden contas por uns chíos nos que a Garda Civil mestura de forma deliberada antisionismo e antisemitismo para criminalizar" a solidariedade con Palestina, seguindo o ronsel de países como Alemaña ou Reino Unido. "En Alemaña están vetando mobilizacións propalestinas, mentres que en Reino Unido actos de protesta ou de acción directa están sendo xudicializados considerados como accións terroristas".
Liberdade de expresión
O caso de Bruno Lopes Teixeiro supón para o BNG "unha ameaza directa á liberdade de expresión e ao pluralismo político" e cuestiona "a incapacidade" da Garda Civil "para diferenciar antisionismo de antisemitismo", polo que pide unha investigación interna. "Defender os dereitos do pobo palestino non pode ser tratado como un delito", afirma Néstor Rego.
