Na Galiza diagnostícanse ao ano uns 2.400 casos de cancro de próstata, un dos máis comúns

Por vez primeira no mundo, o servizo de uroloxía do Hospital Álvaro Cunqueiro de Vigo conseguiu extirpar a pasada semana un tumor de próstata mediante cirurxía robótica, cunha única incisión a través da cal se extraeu a glándula prostática. Unha operación sen precedentes que puxo no foco unha doenza, o cancro de próstata, pola que cada ano falecen na Galiza arredor de 500 persoas, segundo os últimos datos facilitados polo Sergas a Nós Diario. Hoxe conmemórase en todo o planeta o Día mundial do cancro de próstata, unha data que ten por obxectivo concienciar arredor desta enfermidade e apostar na súa prevención.

A incidencia de tumores de próstata foi en 2022 –último ano con rexistros– de 2.422 casos no noso país, dos que 1.847 corresponderon a homes maiores de 65 anos, 574 a homes de 45 a 64 anos e 1 só caso a un home de menos de 44. Por áreas sanitarias, a incidencia foi de 484 casos na área da Coruña e Cee, 328 na de Compostela e O Barbanza, 187 na de Ferrol, 373 na de Lugo, A Mariña e Monforte, 271 na de Ourense, Verín e O Barco, 262 na de Pontevedra e O Salnés e 517 na de Vigo. Ese ano faleceron 493 doentes, a gran maioría (469) homes de máis de 65 anos.

Desde o ano pasado está en marcha o primeiro proxecto piloto de cribado deste tumor, no que participa Galiza, nas áreas sanitarias de Ferrol –cunha mostraxe de 12.000 homes de entre 50 e 69 anos– e que agora comeza a funcionar tamén na de Lugo, Monforte e A Mariña.

O cancro de próstata é un dos máis comúns, non só na Galiza senón en todo o Estado español, do que se diagnosticaron en 2024 arredor de 30.000 casos a nivel estatal. Pero tamén é un dos cancros con maiores taxas de supervivencia, xa que 75% dos casos rematan en curación. Este tipo de cancro prodúcese cando as células cancerosas forman un tumor no interior da próstata, unha pequena glándula que forma parte do aparato reprodutor masculino. É o tipo máis frecuente nos homes, pero soe ser tratábel e ten un alto índice de supervivencia, sinalan as persoas expertas.

A detección precoz, clave

Algúns cancros de próstata crecen lentamente e nunca causan síntomas na vida dun home, pero outros poden pór en perigo a súa vida e a súa saúde se non se tratan. Por iso o persoal médico destaca a importancia de detectalos e de tratalos precozmente, antes de que aparezan os síntomas.

A detección precoz deste tipo de tumores faise a través dunha análise de sangue para identificar en cada doente o Antíxeno Prostático Específico (PSA), unha proteína que libera o órgano prostático e segundo o nivel de presenza desta proteína estímase a posibilidade de que o paciente desenvolva cancro. Habitualmente, en niveis entre 4 e 10 nanogramos por mililitro de sangue o paciente ten 25% de posibilidades de desenvolver este tumor, e máis de 10 nanogramos elevan a 50% esa probabilidade.

Logo dos resultados da analítica os pacientes con elevada presenza de PSA pasan ao Servizo de Uroloxía, onde se practican as probas complementarias para determinar a presenza ou non da enfermidade. Trátase do tracto rectal, das ecografías e, se for preciso, dunha biopsia prostática. En todos os casos os profesionais sanitarios explican que estas probas son molestas pero non dolorosas, e resultan fundamentais para detectar os cancros de próstata a tempo e mesmo en moitas ocasións para desbotar falsos positivos.