Galiza é a cuarta autonomía do Estado cun maior tempo de espera para a valoración da dependencia, de 361 días

Galiza é a cuarta autonomía do Estado español co maior tempo medio de espera para unha valoración da dependencia, con 361 días de agarda. Todo isto a pesar de terse reducido o número de persoas que se atopan nesta situación de espera, ao reducírense a 2.034 a día 30 de xuño, a maior caída a nivel estatal. Isto implica 26,6% persoas menos que ao empezar o ano.

Son datos que publicou esta semana a Asociación de Directores e Xerentes en Servizos Sociais, que advirte que, por primeira vez nos últimos dez anos, en seis meses aumentaron no conxunto do Estado español tanto as persoas en espera de que se lles recoñecese a dependencia (286.861 en total) como o tempo medio (342).

Desta maneira, de acordo con este informe, Galiza consegue unha boa evolución en diversos parámetros. En concreto, é a que máis reduciu as persoas en espera (-26,6%), a que máis beneficiarios de prestacións aumentou (+10%) e a segunda en incremento de persoas con dereito á prestación (+8,6%).

Máis esta boa evolución non foi quen de borrar a mala dinámica amosada neste eido na Galiza. Así, Galiza continúa entre as autonomías coa demora máis alta (361 días), case 20 días máis que a media estatal, aínda que é certo que se anota a cuarta maior redución nos últimos seis meses (-25 días).