O forte vento e os eucaliptos favoreceron a expansión do fogo en Ponteceso
Mentres que a parroquia de Corme Aldea (Ponteceso, Bergantiños) saía esta cuarta feira á noite do nivel de alerta Situación 2 -declarado o día antes pola proximidade dun incendio ás casas-, esta alarma era declarada nas Neves (O Condado), onde dúas frontes ameazaban varias vivendas. A situación "é moi crítica", recoñecía o alcalde.
O concello de Ponteceso (Bergantiños), converteuse nos últimos catro días na zona cero dos incendios na Galiza. O primeiro deles, xa extinguido, declarouse na tarde do sábado no lugar do Couto, na parroquia de Cospindo, e arrasou una superficie de 200 hectáreas, obrigando a desaloxar varias vivendas e a praia de Balarés. Un segundo, principiado nesa mesma xornada na parroquia de Brantua, atopábase esta cuarta feira estabilizado, após queimar 170 hectáreas, dando por controlado a Consellaría de Medio Rural o fogo comezado na madrugada do domingo na parroquia da Graña, que calcinou 100 hectáreas.
A situación máis crítica estaba na mañá desta cuarta feira na parroquia de Corme Aldea. Segundo o último parte informativo emitido pola Consellaría de Medio Rural, neste lugar arderon máis de 60 hectáreas, téndose decretada unha alerta de Situación 2 como medida preventiva pola súa proximidade ás vivendas. Á noite o incendio seguía sen estar controlado pero desactivouse a Situación 2. Na segunda feira as autoridades galegas procederon a desaloxar a veciñanza da parroquia, que só puido volver ás súas casas á última hora da noite, sendo cercados polo fogo os núcleos da Costa, A Ermida, Guxín, O Osmo, Somonte e a igrexa de Corme Aldea.
O alcalde de Ponteceso, José Manuel Mato (PP), en declaracións a Nós Diario, non dubida en cualificar o acontecido como "unha catástrofe". Nesta dirección, asegura que "levamos moitos días de incendios e necesitamos unha pausa para recuperarnos. Isto ten que parar, porque senón árdenos o concello enteiro". A visión de Mato é partillada polos membros do operativo contra o lume desprazados ao municipio e contactados por este medio ademais de pola veciñanza que atendeu Nós Diario.
Así, o actor e escritor veciño de Corme, Suso Lista, destaca que "isto é un desastre, está todo ardido, pero é a crónica dunha cousa anunciada". Os membros do operativo contra incendios da Consellaría de Medio Rural presentes en Ponteceso consultados por este medio responsabilizan da expansión do lume a diversos factores. Neste sentido, explican que "as condicións meteorolóxicas da terza feira, cun nordés moi forte, favoreceron o lume e impediron actuar aos medios aéreos até última hora, o que nos restou eficacia para combater o incendio". Ao tempo, destacan que "o estado e a dimensión de moitos camiños forestais dificultaron o acceso dos medios terrestres a determinadas zonas afectadas polo incendio".
A este respecto, o rexedor de Ponteceso apunta que "teremos que falar coas parroquias para ampliar os camiños e que poidan entrar en todas partes os camións contra o lume".
A proximidade dos eucaliptos ás vivendas foi outro factor de risco que operou no incendio. Nesta dirección, o alcalde recoñece que "as plantacións de eucalipto están moi próximas ás casas. Desde o Concello estamos remitindo notificacións aos propietarios para que cumpran co fixado na lei e limpen os seus terreos e imos ser aínda máis exixentes". As imaxes, achegadas do incendio vivido na terza feira en Corme Aldea certifican que moitas plantacións de eucaliptos estaban a menos de 50 metros das vivendas e do solo de núcleo rural, incumprindo así o que estabelece a lexislación de aplicación na Galiza.
"O eucalipto colonizouno todo", apunta Lista, quen incide en que "as terras agrícolas que foron abandonadas a finais dos anos 80 e comezos dos 90 foron ocupadas por eucaliptos". Nesta dirección, sinala que "o monte en Corme está absolutamente abandonado, non hai ningún tipo de mantemento e os eucaliptos están en todas partes sen ningún tipo de control". O visor do Inventario Forestal Continuo da Galiza desvela como as parroquias de Brantuas, Corme Aldea, Cospindo e A Graña e o resto do municipio de Ponteceso caracterízanse por contar con amplas masas de eucaliptos, cunha presenza secundaria de coníferas, que non deixan de perder peso.
A situación de abandono das masas forestais preocupa á veciñanza. Sen ir máis lonxe, o incendio do sábado na parroquia de Couto orixinouse pola explosión cun cable de alta tensión que caeu ao chan nunha faixa de monte propiedade da empresa Naturgy, que a compañía, segundo a denuncia, non tiña rozada malia ser a súa obrigación. De feito, un mes antes do incendio, un veciño denunciou ante a Garda Civil á empresa eléctrica, que non procedeu a facer os traballos de limpa do terreo até dous días após o comezo do lume.
José Manuel Mato entende que é necesario reforzar os medios de loita contra o lume. Neste punto, indica que "non contamos con tomas de auga suficientes no concello para actuar contra os lumes, polo que temos que pór en marcha máis para estar mellor preparados en caso dunha situación de emerxencia". Neste sentido, os técnicos da Consellaría de Medio Rural consultados por Nós Diario apuntan que "o único que ten bo esta zona en caso de lumes é a proximidade á auga do mar, o resto son problemas. E unha área complexa, con moito vento, con zonas moi pendentes e con plantacións de especies pirófitas".
Medio Rural informa de 10 incendios activos
A subdelegada do Goberno español na Coruña, María Rivas, manifestou esta cuarta feira desde Ponteceso que "o Goberno de España ten todos os recursos do Estado a disposición da Galiza para combater os incendios" e destacou que “queimar os nosos montes non só é un delito, senón un ataque directo á vida, ao territorio e á seguridade de milleiros de persoas”. Nese sentido, a UME, que actuou no incendio de Corme Aldea, Ponteceso, desprazouse onte ás Neves. Ao feche desta edición, o incendio forestal neste concello do Condado, declarado na parroquia de Batalláns, superaba as 50 hectáreas de superficie afectada, decretándose a Situación 2 como medida preventiva pola súa proximidade ás vivendas, máis concretamente ao núcleo da Abelleira. Medio Rural informaba na noite de onte de 10 incendios activos. Entre eles, o da parroquia da Picoña en Salceda de Caselas (comarca de Vigo), que segundo as últimas estimacións provisionais afectaba arredor de 80 hectáreas. Desactivábase a Situación 2 en Camariñas (Terra de Soneira) e quedaban controlados dous incendios en Ponteceso, o das parroquias de Brantuas e o da Graña. Mantíñanse activos dous incendios na Fonsagrada, outro en Mondariz (O Condado) e outro en Vilardevós (comarca de Verín).
