Médicos en folga apuntan ao "éxodo": "Nun pobo de Suecia, catro dos dez doutores son galegos"
Varias decenas de facultativos mobilizáronse esta quinta feira, terceira xornada de folga convocada pola Confederación Estatal de Sindicatos Médicos (CESM) na Galiza, ante as portas do Hospital Clínico de Santiago e do Complexo Hospitalario Universitario de Ourense (CHUO) para instar a Consellaría de Sanidade a "sentar e falar". Estas protestas seguen as que os dous primeiros días decorreron noutros municipios como Vigo, Lugo e Burela. En Ourense, os sanitarios volveron concentrarse e, en declaracións aos medios, o delegado de CESM, Alberto Escobar, reclamou "un acordo escrito, táctico" á Xunta: "Non vale unha declaración de intencións".
Sobre a participación, no CHUO arredor de 80% dos quirófanos están sen actividade, de acordo con cifras que dá o propio sindicato convocante, que asegura que os datos de seguimento do paro "son moi superiores" aos que ofrece a Administración. A participación, sinalan, rolda o 62% nesta terceira xornada.
"Sanidade pode maquillar datos, pero a realidade é que, se de 19 quirófanos só funcionan sete e de cada 100 consultas só funcionan 45 e nestes tres días os datos de adiamentos cirúrxicos son que se suspenderon 110 cirurxías... Son os datos obxectivos a cuantificar", explicou Escobar. Unha situación que se repite en Verín, onde só se están a atender cirurxías "de urxencia".
"Dignidade laboral"
En Santiago, decenas de profesionais protestaron na porta principal do Clínico con 'Dignidade laboral' como principal lema e consigna que corearon, acompañados de pitos e bucinas. En declaracións á prensa, o responsábel de CESM na circunscrición da Coruña e médico do 061, Manel Gómez, incidiu en que esta folga busca "facer presión" á Consellaría para negociar unhas melloras de condicións laborais e retributivas.
"Buscamos, principalmente, a dignidade do paciente e estar seguros do que facemos. Non se pode tratar a xente coma se fósemos maquinaria continua e se isto fose unha máquina de chourizos", explicou Gómez, para seguidamente reclamar máis "tempo" de consultas. O sindicalista pon o foco no "éxodo de profesionais" que se produce cara a outros territorios do Estado español e de fóra. Como exemplo, mencionou o caso de Hudiksvall, un pobo sueco onde "catro dos dez médicos" que hai son galegos.
A isto engadiu o veto a que os facultativos da pública que compatibilicen coa actividade privada poidan cobrar o complemento específico, algo que "só" ocorre en Asturias, Nafarroa e Galiza, salientou.
O delegado de CESM celebrou o apoio que está a recibir a folga no Clínico, singularmente no servizo de Anestesia, onde se paralizaron "moitas intervencións" porque "só funcionan tres quirófanos"; así como nos de Xinecoloxía, Oftalmoloxía e Radioloxía.
"A xente está a apoiar a folga. Moitos médicos están a suspender intervencións e consultas. Pedimos desculpas á poboación polos problemas que puidemos causar", lamenta, aínda que alega que os facultativos están "cansos" despois de tres anos de pandemia e que é o propio Sergas o que "forzou" as protestas.