A Fiscalía pide 11 anos de prisión para un home por abusos sexuais a unha menor

A sección sexta da Audiencia da Coruña, con sede en Compostela, acolle na semana que entra, nos días 15 e 16 de marzo, un xuízo a porta fechada no que se xulga un delito de abusos sexuais.

A Fiscalía solicita 11 anos de prisión para un home acusado dun delito continuado de agresión sexual a unha menor de 16 anos con penetración en grao de tentativa.

Segundo o escrito de cualificación fiscal, o acusado, que mantén coa vítima unha relación de parentesco, realizou tocamentos á menor e tentou penetrala en varias ocasións durante, polo menos, catro anos.

Os feitos denunciados teríanse estendido no tempo até que a menor lle contou os feitos á familia e a unha amiga, en marzo de 2018, momento no que se denunciaron os feitos.

Como consecuencia diso acordouse, por auto con data do 16 de marzo de 2018, como medida de protección á menor, suspender a garda e custodia da menor e a prohibición de comunicarse por calquera medio con ela.

Así mesmo, por auto con data do 20 de marzo de 2018, impúxoselle tamén a prohibición de achegarse a unha distancia inferior a un quilómetro da menor. Todas as medidas de protección impostas seguen vixentes até a data.

O Ministerio Público solicita que ao procesado se lle impoña a prohibición de achegarse a unha distancia inferior a un quilómetro á prexudicada, ao seu domicilio, lugar de estudo ou traballo, ou calquera outro onde se ache, así como a prohibición de comunicarse con ela por calquera medio por prazo de 15 anos.

De igual forma, a Fiscalía considera que se lle debe impoñer a pena de liberdade vixiada por prazo de dez anos, a inhabilitación especial para o exercicio da patria potestade sobre a menor por prazo de seis anos e a inhabilitación especial para calquera profesión ou oficio, sexa ou non retribuído, que implique contacto regular e directo con menores de idade por tempo de 10 anos.

Finalmente, como responsabilidade civil, a Fiscalía solicita que o presunto autor do delito teña que indemnizar á prexudicada por estes feitos cunha cantidade de 10.000 euros, segundo informaron fontes do Ministerio Público.

Proceso en Vigo

A sección quinta da Audiencia de Pontevedra, con sede en Vigo, xulga na semana que entra, o vindeiro 15 de marzo, a un home por un delito continuado de agresión sexual a menor de 16 anos, para o que a Fiscalía pide tres anos de prisión.

Segundo o escrito de cualificación fiscal, o acusado sobou á menor nun lugar público e pediulle que lle dese un bico, a pesar de a negativa e "evidente incomodidade da vítima". Como responsabilidade civil, solicítase que indemnice á prexudicada por estes feitos na cantidade de 2.000 euros, segundo indicaron fontes do Ministerio Público.

O Ministerio Público solicita que ao procesado se lle impoña a prohibición de achegarse á prexudicada, ao seu domicilio, lugar de estudo ou traballo, ou calquera outro onde se ache, así como a prohibición de comunicarse con ela por calquera medio por prazo de cinco anos.