Fiscalía presenta unha demanda colectiva contra Audasa por “abuso no cobro de peaxes” durante as obras de Rande

ponte de rande AP9

O Ministerio Público pide que se devolva, con intereses, o diñeiro pagado polas persoas usuarias do tramo entre o 27 de febreiro de 2015 e o 1 de xuño de 2018.

 

A Fiscalía presentou nun xulgado de Pontevedra a demanda de xuízo ordinario contra Audasa, concesionaria da AP-9, en exercicio da acción colectiva en defensa das persoas usuarias da Autoestrada do Atlántico. Unha demanda que se presenta por entender o ministerio público que Audasa cometeu prácticas “abusivas” ao cobrar íntegros peaxes a pesar de que o servizo era deficiente durante as obras de ampliación de Rande. Non só se mantiveron os prezos senón que mesmo estes incrementaron embora que a circulación continuaba afectada polas obras.

 

A acción da Fiscalía inclúe a petición de restitución das cantidades pagadas polas persoas usuarias da AP-9 por peaxes durante eses tres anos de obras na ponte sobre a Ría de Vigo.

 

Embora as “restricións permanentes de tráfico”, a empresa continuaba cobrando as mesmas tarifas de peaxe. E o servizo, evidentemente, non era o mesmo: redución de carril e velocidade, atascos, engarrafamentos de tráfico, perda de tempo…

 

Por iso, os vehículos que nese período circularon nese tramo da AP-9 “recibiron un servizo de autoestrada con insuficientes condición de fluidez e seguridade”.