Ferrolterra exixe un tren "digno" e a fin do "abandono ferroviario": "Estamos fartos"
"Non se ve moitas veces unha unidade como esta, desde o Bispado até os concellos da comarca, equipos de fútbol, comités de empresa, campus universitario, asociacións veciñais, clubs deportivos....". Esperanza Piñeiro, portavoz do Foro Cidadán polo Ferrocarril, transmite a Nós Diario o seu convencemento de que a manifestación que o Foro convoca para este domingo en Ferrol baixo o lema "Por un ferrocarril do século XXI" vai ser "determinante" na reivindicación de Ferrolterra, O Eume e Ortegal do seu dereito a ter un "tren digno". Piñeiro, historiadora especializada en Ferrol e a súa comarca, incide na "unidade" en torno a esta demanda.
"Aquí sempre houbo que loitar moito para conseguir as cousas", explica a portavoz do Foro. E o ferrocarril é unha desas loitas na comarca desde hai moito tempo. "Aquí o tren chegou con moito atraso, en 1913, máis de 30 anos despois de que o fixese á Coruña, e chegou despois de que en Ferrolterra se loitase unidos para logralo", indica a Nós Diario. Pasaron as décadas e a sensación nesas comarcas é de "abandono ferroviario". "O tren entre Ferrol e A Coruña tarde 1 hora e 20 minutos e só ten só catro frecuencias de ida e catro de volta, non está electrificado... A xente non usa o tren porque non lles serve! Non podes usalo para ir traballar ou estudar dunha cidade a outra", explica Piñeiro.
Denuncia que se ben nun principio Ferrol ía estar incluído no Eixo Atlántico ferroviario finalmente non foi así, e esa mesma exclusión, critica, aplicouse no corredor de mercadorías. "Hai unha desidia, un abandono cara estas comarcas" nos temas de mobilidade, mantén a historiadora. Ao que acontece co servizo ferroviario engade que a Autoestrada AP-9 "chegou tarde" a esas comarcas e que o trazado final da autovía Transcantábrica (A-8) "deixounos fóra". "Xa está ben de que nos marxinen", conclúe a portavoz do Foro, cuxas demandas tiveron estes días o apoio de mancomunidades de concellos e do propio Parlamento galego. "Estamos fartos de desidia e de abandono", di Piñeiro, que lembra que see stá a"marxinar" en conexións e mobilidade unha zona "que suma máis de 200.000 habitantes".
Ferrolterra, O Eume e Ortegal quedan fóra das actuacións de altas prestacións, cunha conexión deficiente coa Coruña e unha liña centenaria sen electrificar nin modernizar. “Falamos dunha infraestrutura con curvas de radio pequeno e mesmo con travesas de madeira nalgúns tramos”, lembrou a representante do Foro.
Entre as demandas principais que se van explicitar este domingo na manifestación en Ferrol está a de instar o Estado a restituír as frecuencias entre Ferrol e A Coruña previas ao 9 de xuño e a recuperar a conexión directa con Madrid. Ademais, soliítase iniciar en 2025 o estudo informativo para modernizar integralmente a liña Ferrol–Betanzos Infesta–A Coruña, con rectificación de curvas, duplicación de vía, electrificación e incorporación ao Corredor Atlántico. Outro demanda é a aposta pola creación dun servizo de proximidade estábel entre Ferrol e A Coruña, destinado a vertebrar "un espazo conxunto de máis de 600.000 habitantes".
Aposta pola proximidade e a conexión co AVE
O Foro defende que é necesario crear unha rede de transporte comarcal onde estean incluídos todos os modos de transporte colectivo existentes con horarios e tarifas integradas, así como avanzar na construción da estación intermodal de Ferrol. Recolle ademais a necesidade de revisar e mellorar os apeadeiros ao longo da liña para garantir accesibilidade e un servizo adaptado ao territorio. Reclama tamén incluír as dársenas portuarias de Ferrol na Rede Transeuropea de Transporte e demanda que a Xunta solicite o traspaso das competencias ferroviarias de proximidade, sempre que o Estado complete as obras pendentes e garanta financiamento e material. Finalmente, insta o Estado a acelerar os pasos necesarios para a súa integración plena no Eixo Atlántico e garantir a chegada da alta velocidade a Ferrol e Lugo.
