Non só os grupos da oposición e o voceiro parlamentario do PP manifestáronse esta segunda feira a respecto dos lumes que afogan a varias comarcas do sur galego. Mentres a nacionalista Ana Pontón e o socialista Gonzalo Caballero poñen en dúbida as políticas de loita contra os incendios, o presidente fala para reiterar as teorías da Consellaría de Medio Rural sobre a intencionalidade en todos os focos detectados.
Con máis de 7.500 hectáreas de paraxes naturais desaparecidas polo paso das chamas, Alberto Nuñez Feixoo lamenta a virulencia coa que están avanzando as distintas frontes.
No entanto, centra o seu discurso en subliñar "a intencionalidade dos incendios na Galiza xa é un clásico".
O lider popular fixo estas declaracións nunha visita a Noia, onde tamén o interrogaron sobre os operativos de extinción. Neste sentido, aclara que a prioridade é "preservar as casas e o patrimonio" da veciñanza afecta.
Recalca que polo de agora seguen "a salvo" malia que a xornada de onte foi "complicada". Xustifica esta aseveración recordando que se orixinaron varrrios lumes "de forma simultánea e sucesiva".
Hai distintos focos nos mesmos municipios e incendios declarados en comarcas non moi lonxanas entre si. De momento, moito deles están avanzando sen control pero Feixoo di ter a confianza de que a situación quede estábel pronto.
Un dos seus intereses é fechar a tempada estival cun datos que, até esta fin de semana, estaban sendo "positivos" con respecto ao número de hectáreas calcinadas outros anos.