Falece unha muller de 66 anos após derrubarse a vivenda na que residía en Cartelle
O colapso produciuse nunha casa de dúas plantas da localidade de Pereda; a lousa de formigón do segundo andar cedeu e precipitouse sobre o primeiro.
Unha muller de 66 anos faleceu esta quinta feira no concello de Cartelle (Terra de Celanova) tras o derrubamento da vivenda na que residía, situada na localidade de Pereda.
De acordo coa información facilitada polo servizo de emerxencias 112-Galiza, o aviso produciuse arredor das 17.45 horas, cando Protección Civil de Cartelle alertou do colapso do inmoble. De inmediato activouse un operativo de rescate para comprobar se a persoa que habitaba a casa se atopaba no interior no momento do suceso.
Até o lugar desprazáronse efectivos de Emerxencias Sanitarias da Galiza-061, Garda Civil, Bombeiros de Ourense, o GES Terras de Celanova e voluntariado de Protección Civil de Cartelle.
Unha vez no punto, os equipos de intervención constataron que se trataba dunha vivenda de dúas plantas e que a lousa de formigón do segundo andar cedeu, derrubándose sobre a primeira planta, o que provocou o fatal desenlace. As circunstancias do derrubamento están a ser avaliadas polos servizos competentes.
