Extinguido o incendio da Caniza e estabilizados os tres de Ponteceso, o de Vilardevós e o de Vilar de Barrio
A Consellaría do Medio Rural informou de que este domingo deuse por extinguido o incendio forestal que comezou a pasada cuarta feira na localidade da Caniza (A Paradanta). En concreto, deuse por extinguido ás 18.22 horas tras calcinar 295 hectáreas.
Por mor deste incendio decretouse na noite da cuarta feira o confinamento da poboación de sete núcleos, unha medida preventiva que foi desactivada na mañá da quinta feira. O aviso xerouse por medio do sistema É-Alert.
A Situación 2 desactivouse finalmente ás 12.22 horas da sexta feira, polo que se desmobilizou aos efectivos da Unidade Militar de Emerxencias (UME) que estiveron a colaborar nas tarefas de extinción.
O fogo iniciouse ás 16.23 horas da pasada cuarta feira en até cinco puntos diferentes de forma case simultánea, "o que apunta a unha clara intencionalidade", segundo sinalou a Consellaría. Até alí mobilizáronse 15 técnicos, 46 axentes, 66 brigadas, 43 motobombas, cinco pas, sete unidades técnicas de apoio, sete avións e dez helicópteros.
Ponteceso
Os tres incendios declarados no concello de Ponteceso (Bergantiños) foron estabilizados entre a tarde do domingo e a mañá desta segunda feira, concretamente afectaban as parroquias de Cospindo, Brantuas e A Graña.
En concreto, a Consellaría do Medio Rural explicou que o lume rexistrado en Cospindo iniciouse ás 16.12 horas deste sábado e afecta a unha superficie de 200 hectáreas. Até alí mobilizáronse 11 axentes, un técnico, 13 brigadas, dez motobombas, tres pas, tres unidades técnicas de apoio, catro helicópteros e un avión.
O alcalde da localidade, José Manuel Mato, confirmou que o fogo rexistrado nesta parroquia obrigou a desaloxar veciños e veciñas da aldea de Balarés, xunto á praia. Por outra parte, asegurou que na aldea do Couto atopábanse traballando escavadoras para tentar crear unha devasa e que o lume non pase a unha zona próxima onde hai casas. Ademais, cortouse o acceso por estrada a Balarés, "así como o acceso desde Brantuas, no cruzamento que vai a Brantuas dirección Malpica até Ponteceso".
O incendio de Brantuas afecta unha superficie de 170 hectáreas e iniciouse ás 20.30 horas do sábado, mobilizáronse catro técnicos, 11 axentes, 16 brigadas, sete motobombas, dúas pas, tres unidades técnicas de apoio, dous helicópteros e dez avións.
Finalmente, o incendio activo na parroquia da Graña, afecta unha superficie de 100 hectáreas e comezou ás 00.30 horas deste domingo. Para a súa extinción mobilizouse un técnico, 12 axentes, 14 brigadas, 11 motobombas, dúas unidades técnicas de apoio e sete helicópteros.
Vilardevós
A Consellaría do Medio Rural informou de que o incendio declarado este sábado no municipio de Vilardevós (comarca de Verín) deuse por estabilizado este domingo ás 22.38 horas tras calcinar 570 hectáreas. Ademais, desde as 22.15 horas desactivouse a Situación 2 decretada pola súa proximidade a núcleos de poboación.
Tal e como relatou a alcaldesa do municipio, Eva Pérez Gamote, como medida de prevención confinouse aos veciños e ás veciñas do núcleo de Dona Elvira pola proximidade do fogo e o propio núcleo de Vilardevós por precaución ante o fume.
En concreto, o fogo comezou ás 23.04 horas desta sexta feira e obrigou a despregar á Unidade Militar de Emerxencia (UME) con 70 efectivos e 34 medios, segundo a Delegación do Goberno español. Por outra parte, até o momento mobilizáronse 49 axentes, sete técnicos, 71 brigadas, 48 motobombas, seis pas, 12 helicópteros e 12 avións.
Vilar de Barrio
A Consellaría do Medio Rural informou de que se deu por estabilizado un incendio declarado este domingo na localidade de Vilar de Barrio (A Limia). En concreto, estabilizouse ás 21.07 horas e afectou xa unhas 20 hectáreas. En concreto, o fogo comezou ás 12.31 horas deste domingo na parroquia de Rebordechao. Polo momento, mobilizouse a un técnico, sete axentes, 22 brigadas, nove motobombas, unha pa, seis helicópteros e seis avións.
