Expertos sitúan o pico da sexta vaga nunha semana

A evolución da pandemia da Covid mantén en alerta as autoridades sanitarias ás portas do Nadal. Segundo recoñeceu o conselleiro de Sanidade esta segunda feira, o comité clínico que asesora a Xunta da Galiza está a valorar algunhas "recomendacións" de cara a este período festivo, marcado pola mobilidade e a maior interacción social ao mesmo tempo que o seu departamento estuda "volver recuperar" os puntos Covid para a realización de test nos tres aeroportos galegos. O comité experto traballa coa posibilidade de limitar as reunións familiares e de amizades a "8 ou 10 persoas" en función da evolución epidemiolóxica, unha medida que xa acordou para o sector da hostalaría no inicio desta sexta vaga, onde non poden sentar á mesma mesa, en interiores, máis de oito persoas. Julio García Comesaña incidiu en que, polo momento, esta rebaixa no ámbito privado non pasa de ser unha "recomendación". Unha advertencia que busca reducir os contactos e o risco de transmisión, sobre todo en lugares fechados. Neste sentido, reivindicou o uso do certificado Covid "para garantir espazos máis seguros". Na actualidade, explicou, é un requisito obrigatoria para acceder á hostalaría e a hospitais, á espera de que o Tribunal Superior de Xustiza da Galiza dea autorización á Xunta para poder estender o seu uso a cinemas e eventos masivos, como solicitou. Certificado Covid Co pasaporte Covid, a persoa propietaria exhibe unha certificación oficial de ter superado a enfermidade, unha proba negativa do virus SARS-CoV-2 ou a pauta completa de vacinación. Para Francisco Caamaño Isorna, profesor e director do departamento de Saúde Pública da Universidade de Santiago de Compostela (USC), este requisito, "a priori, é unha idea excelente". O problema, advirte, é que outorga unha seguridade que favorece a confianza de quen se encontra ao mesmo tempo no mesmo local. "Ao que nos sentimos máis seguros cambiamos o noso comportamento: sacamos a máscara, paseamos polo restaurante, falamos en alto, cantamos. Ao mudar a forma de nos comportar incrementamos o risco" e calquera beneficio do certificado Covid "quedaría borrado". Caamaño Isorna considera que o certificado Covid é unha medida "necesaria" pero non pode levar á xente a mudar a súa conduta. "É un filtro, e a pesar de que se está a pedir na porta de moitos locais, a poboación debe ser consciente de que non sempre funciona. Non hai garantía absoluta de que todas as persoas que están dentro desa discoteca ou dese restaurante están vacinadas". Tests de antíxenos O certificado Covid non é unha carta branca. Tampouco o son, salienta o experto en Saúde Pública os test de antíxenos ante a proliferación de encontros familiares ou celebracións de amigos que fían eses encontros a unha proba negativa previa. "Esta estratexia comeza a ser un problema. Un test de antíxenos negativo non pode conducir a unha interacción alegre e despreocupada". É un erro, insiste Caamano Isorna, pódense dar falsos negativos que moitas veces deixan tras de si "máis contaxios". Segundo recolle o protocolo do Sergas o uso dos test rápidos, recoméndase en pacientes sintomáticos nos cinco primeiros días desde o inicio da sintomatoloxía, xa que non hai evidencia suficiente para a súa utilización en asintomáticos. Máis liberdade, maior incidencia O uso da máscara en espazos fechados, defende o profesor de Saúde Pública da USC, é a mellor proba de que a pandemia non rematou e tamén o único lazo que mantén o conxunto da poboación ligado a un período de restricións que xa é parte do pasado. A vacinación fronte ao coronavirus mudou as perspectivas e as estatísticas da Covid. "Era de esperar que a normalización da vida trouxera consigo unha suba dos contaxios, pero tamén sabiamos que ese aumento ía ter un impacto en mortes e UCI moi inferior ao coñecido". A sexta vaga da pandemia prodúcese nun contexto de maior liberdade e "estamos vendo consecuencias diferentes", concorda Daniel González Peña, profesor da Escola Superior de Enxeñaría Informática da Universidade de Vigo no campus de Ourense e autor do 'Semáforo Covid Galiza'. Con 86% da poboación galega vacinada, "estamos facendo unha vida practicamente normal, e iso deixa incidencias altas, mais tamén diferenciadas entre o norte e o sur da Galiza". As áreas sanitarias do norte "van mellor" que as do sur, afirma González Peña, tamén en hospitalizados. Así, Vigo, Ourense e Pontevedra sitúanse á cabeza, con 215 doentes Covid ingresadas fronte ás 77 que atenden nas áreas da Coruña, Santiago, Ferrol e Lugo. Vigo e Ourense En palabras do presidente da Xunta, Alberto Núñez Feixoo, a área de Vigo é "a de maior preocupación", con 3.885 casos activos e 110 persoas hospitalizadas, 20 delas en unidades de coidados intensivos. "Aínda que temos que convivir co virus, non facilitemos o seu contaxio", solicitou o xefe do Executivo galego, quen apelou a evitar as aglomeracións e con elas, o risco de transmisión do coronavirus. O conselleiro de Sanidade referiuse tamén á situación da área sanitaria de Ourense que despois de liderar o ascenso da Covid durante varias xornada, nos últimos días logrou frear o seu crecemento. Con 2.708 casos activos ten 62 pacientes ingresados, sete deles, críticos. Segundo García Comesaña, Vigo e Ourense son os territorios con maior incidencia e onde máis preocupa o impacto que poida ter na presión hospitalaria, polo que non descarta "facer unha análise detallada para que non cheguen ao momento crítico na UCI" en previsión das consecuencias que poida deixar a ponte festiva de decembro, pendente aínda de se reflectir nas estatísticas. Polo momento só o Hospital Álvaro Cunqueiro avanzou a finais da semana pasada a apertura dunha nova área destinada a doentes Covid e a necesidade de comezar a reprogramar cirurxías non urxentes. Malia o receo que ofrecen Vigo e Ourense, Daniel González Peña precisa que, en conxunto, hai unha baixa taxa de hospitalización. "O número de persoas ingresadas por caso na Galiza sitúase en cotas mínimas e iso é bo". A curva de hospitalización da sexta onda está a seguir os pasos da quinta "que foi a que marcou a diferenza con respecto á terceira" para confirmar os efectos beneficiosos da vacina. "Os números son moi claros", di Francisco Caamaño Isorna. "Está a dividir por 20 a probabilidade de acabar cunha doenza grave, así que a consigna debe ser: vacina, para quen aínda non a recibiu, prudencia, espazos abertos e ventilación mais máscara en sitios fechados con grupos reducidos". Ademais, González Peña pon o foco na razón de taxas. "A velocidade de crecemento xa marcou un cambio de tendencia. O crecemento é máis lento e, o normal, á espera dos efectos da ponte, é que nunha semana se alcance o pico desta vaga". Datos actualizados A Galiza vén de iniciar a semana con máis de 12.000 casos activos por coronavirus. Segundo o último informe divulgado por Sanidade, hai 12.221 persoas cunha PCR positiva, das cales 292 están hospitalizadas, 243 están en planta, 18 máis e 49 nas UCI, unha máis. O Sergas notificou 1.072 novos contaxios, coas tres áreas sanitarias da metade sur á cabeza en novos positivos e en incidencia acumulada a 14 días, por riba da media galega que se sitúa na contorna dos 440 casos por 100.000.