Estamos ante unha pandemia de gripe aviaria e cólera? A OMS alerta da situación
A Organización Mundial da Saúde (OMS) alertou sobre a posibilidade de enfrontar unha pandemia de gripe aviaria tras coñecerse de casos de transferencia do virus cara a mamíferos e mesmo a humanos.
A través dunha sesión informativa, o director xeral da OMS, Tedros Adhanom Ghebreyesus, confirmou os informes de mamíferos infectados co virus da gripe aviaria H5N1, entre os que se atopan visóns, londras, raposos e leóns mariños.
O funcionario advertiu que este escenario obriga a monitorizar de perto a situación, aínda que considera menos probábel o risco para os humanos. Con todo, revelou que “non podemos asumir que seguirá sendo así, e debemos prepararnos para calquera caso".
A pesar de que o virus H5N1, rexistrado por primeira vez en 1996, propagouse amplamente nos últimos anos entre aves silvestres e aves de curral, especialistas observaron unha transferencia estraña e intermitente cara a e entre humanos, o que fai pensar noutra posíbel pandemia.
Polo momento, a organización internacional aconsella non tocar nin colleitar animais salvaxes mortos ou enfermos antes de informar as autoridades competentes, pois o seu labor agora é estudar os casos en humanos cando ocorran, apuntou o máximo representante da OMS.
O directivo subliñou que a rede mundial de laboratorios do ente e o Sistema Global de Vixilancia e Resposta á Influenza, traballan en monitorizar as cepas en circulación para asesorar os países con infestación sobre o risco para a saúde humana e o tratamento ou as medidas de control estabelecidas.
A OMS aposta por fortalecer a vixilancia en cada Estado, especialmente nas contornas de interacción entre humanos e aves de curral, á vez que traballa en conxunto coas empresas farmacéuticas para asegurar unha subministración global de vacinas e antivirais en caso de ser necesario.
O máximo responsábel do organismo sanitario internacional aproveitou a súa comparecencia para alertar tamén sobre a extensión de surtos do cólera reportados en 23 países que comparten fronteiras e risco con outros 20.
30 Estados confirmaron surtos
Segundo informes da OMS, perto de 30 Estados conformaron surtos da enfermidade o pasado ano 2022, nos cales morreron máis persoas que nos cinco anos anteriores en total. Actualmente, mil millóns de persoas atópanse en risco de contraer o virus, destacou.
Ao tipificarse a auga contaminada como a principal vía de transmisión, o experto remarcou a necesidade do acceso ao auga limpa como principal medida de prevención e fixo unha mención especial a Siria e Turquía, afectadas polas consecuencias de terremotos.
No país árabe notificáronse 85.000 casos de cólera desde o agosto pasado, o que xunto á presenza do sarampelo complica a situación sanitaria dunha nación que atravesa por 12 anos de conflito bélico, indicou o Dr. Tedros.