O ensino público maniféstase en Compostela contra "os recortes e a propaganda" da Xunta

Profesorado, alumnado e asociacións de pais e nais marcharon este sábado polas rúas de Santiago de Compostela para denunciar a "propaganda e os recortes" da Xunta da Galiza nos centros educativos.

Convocada pola Plataforma Galega en Defensa do Ensino Público –composta por entidades de distinta natureza, como o BNG, Galiza Nova, Erguer, a CIG, Asociación Socio-Pedagóxica Galega a Confederación Anpas Galegas, entre outras–, a manifestación partiu da Alameda compostelá pasadas as 12.15 horas e transcorreu por distintas rúas da cidade nova antes de entrar no centro histórico e concluír na Praza de Praterías, onde as manifestantes deron lectura a un manifesto.

Sae a manifestación da Plataforma Galega en Defensa do Ensino Público. A comunidade educativa clama por un #ensinopúblico e de calidade pic.twitter.com/Mz5uSIvYut

— CIG (@galizaCIG) October 26, 2024

"O ensino non se vende"

Entre cánticos como 'A Xunta da Galiza recorta e privatiza', 'Román, atende, o ensino non se vende', 'Hai que apostar polas aulas do rural' ou 'A atención á diversidade debe ser unha prioridade', sindicatos, Anpas chegadas desde diferentes puntos do país e alumnado denunciaron "a propaganda e os recortes" que, ao seu xuízo, aplica o Goberno galego en materia educativa.

Antes de iniciar a protesta, en declaracións aos medios, o secretario nacional de CIG-Ensino, Suso Bermello, acusou a administración autonómica de "total inmobilismo nas condicións de traballo do profesorado", así como nas condicións de atención ao alumnado con necesidades educativas especiais.

Segundo Bermello, esta manifestación pretende, "traer á capital" moitos dos conflitos que foron agromando en centros educativos durante as últimas semanas, no inicio de curso "máis convulso dos últimos anos". 

Neste sentido, indicou que se produce "nun momento onde a propaganda do PP e da Xunta é máis intensa que nunca" e con declaracións "fóra de lugar" que dan a entender que "se está facendo un cambio transcendental cando", ao seu ver, permanece "nunhas posicións de total inmobilismo nas condicións de traballo do profesorado e nas condicións de atención ao alumnado con necesidades especiais".

Gente vinda de Alfoz, Ames, Briom, Ponte Areias, Lugo… Em defesa do ensino público! pic.twitter.com/JS74ljenTH

— o Madeira de Uz ★ (@madeiradeuz) October 26, 2024

O secretario nacional da CIG-Ensino tamén criticou o desenvolvemento do "mal chamado acordo" asinado por CCOO, UXT e Anpe coa Xunta, xa que, en opinión de Bermello "nin sequera nos apartados minimamente aceptábeis está a cumprirse". "Non estamos ante ningún cambio, senón ante unha situación que reproduce o que se fixo en anos anteriores", manifestou antes de censurar que os orzamentos para 2025 presentados polo Goberno galego "conxelan o número de profesorado"; o mesmo, dixo, "que hai catro anos".

Atención á diversidade

Por outra parte, Bermello puxo o foco na atención á diversidade, que "tenta taparse con parches", con programas "con fondos finalistas da Unión Europea" que "precarizan o profesorado, porque se contrata con menos recursos, a xornada partida, sen que se lles paguen os meses de verán" e, ademais, os docentes "están cinco ou seis horas á semana" e a Consellería "non pon nin un euro, xa que son fondos europeos".

Fronte a esa "realidade", a Plataforma Galega entende que "hai que dar unha resposta que debe saír do conflito puntual de cada centro". "Temos que romper coa tendencia a atomizar a resposta", subliñou o representante de CIG-Ensino antes de afirmar que a situación que atravesan "moitos centros" é "idéntica": "Recortes e menos profesorado, con peores condicións de traballo, cocientes que non se están cumprindo e atención á diversidade á que non se dá a resposta que merece".

"Pretendemos evidencialo para dicirlle ao conselleiro que é un mentireiro, que o que di é unha falsidade absoluta e que a educación pública merece algo máis que alguén á fronte que non se cansa de mentir", criticou.

As familias, "fartas"

Á manifestación achegáronse docentes, familias e alumnados procedentes de distintas localidades da Galiza que nos últimos meses veñen reclamando, desde os seus municipios e ás portas dos centros de ensino, profesorado suficiente que garanta unha atención educativa digna e de calidade para todas as estudantes, en igualdade de condicións. Comunidades educativas de Ames e Brión (na comarca de Compostela), Monterroso (A Ulloa), Carnota (Muros), A Mariña, A Coruña... exixiron solucións reais e non máis anunincos ou promesas que non resolven a escaseza de recursos.

A presidenta de Anpas Galegas, Isabel Calvete, demandou á Consellería que mostre "un pouco de compromiso coa educación pública". "As familias estamos fartas de ver como nos toman o pelo", lamentou para, a continuación, denunciar "recortes" que afectan "o alumnado máis sensíbel".

"Hai que ter en conta a opinión das familias, que a educación pública é para eles, para os nenos. Non imos deixar que sexa unha cuestión de diñeiro cando estamos a falar do futuro do noso país", reivindicou.

Manifesto

Ao concluír a marcha, na praza de Praterías, a Plataforma leu un manifesto por "unha educación pública galega con futuro, sen recortes nin propaganda". O texto critica a política educativa "abertamente continuista practicada polo PP nos últimos 15 anos", ademais de expor que os "recortes" se producen "en zonas rurais", polo que os dereitos do alumnado "veñen condicionados pola súa procedencia".

Ademais, reprocha o "forte e descontrolado incremento da oferta privada da FP" e a "falta dunha política de axudas e bolsas" para gastos de desprazamento ou residencia. Por estes e outros motivos, reclama "transparencia e eliminación da censura" por parte da Consellaría de Educación no traslado de información por parte dos centros á representación de calquera colectivo da comunidade educativa; e o "uso exclusivo dos fondos europeos para o que veñen destinados" e non para "contratar profesorado para postos ordinarios".

Sobre as ratios, demanda aplicar a redución que supón o alumnado con diversidade "con carácter inmediato e sen trampas", así como a aplicación das ratios nas aulas mixtas e a redución de horario lectivo.