Roberto Regal: "Enonatur nace para facer na Ribeira Sacra viños de calidade"

Como se iniciou na enocultura? Cando rematei o instituto quería ser monitor deportivo, mais a familia animoume a estudar enoloxía en Ponteareas e cando voltei, despois dunha pequena parada nunha sidraría e mais coa familia, lancei en 2001 a miña consultoría, xusto no momento en que abriron varias adegas na Ribeira Sacra. Entón comecei a asesoralas. Seguín formándome e foi en 2008 cando empecei con Enonatur. Con que obxectivos crea Enonatur? Coa idea de facer viños de calidade, de finca, dar servizos nos viñedos para facer bos viños, coa idea de viabilizar a viticultura na Ribeira Sacra, manter a idea do viño e dignificar o traballo do que era e aínda segue a ser o xornaleiro. Enonatur nace ademais co obxectivo de preservar o medio, facer viños de calidade, viños sans, diferentes e singulares que falen da terra da que proveñen. Que servizos ofrecen? Ofertamos un servizo integral. Agora mesmo concretamente ofrecemos un servizo completo e integral para axudar as persoas a construír o seu propio proxecto vitivinícola. Facemos a viticultura dun modo total ou ben parcial, no caso de que algún dos clientes quixese participar do cultivo, elaboramos e embotellamos a produción do predio con marca e deseño personalizado de cada propietario, é dicir, cunha etiqueta identificativa por cada un dos produtores. Nós traballamos cada parcela de modo individual, vendimámola e embotellamos logo cunha marca personalizada. Aquí só cabe apostar pola calidade de verdade, a singularidade e a saúde, que están moi ligadas entre si Considera que está nun bo momento a Ribeira Sacra? Considero que está ben posicionada mais cómpre mudar moitas cousas. Estamos no mellor momento pero, pola contra, estanse a facer en xeral viños moi estandarizados con base no prezo que teñen e a forma de cultivar. É dicir, en moitos casos estase a exprimir demasiado o solo, non se preserva o bioma, non se traslada unha personalidade de cada climat, falta a idea do terroir, empréganse demasiados herbicidas e químicos e non se fai unha viticultura de calidade. Ao revés, moitas veces faise unha viticultura de subsistencia, collendo uvas que non teñen toda a calidade que deberan. E tratan de viabilizar embotellando esas uvas e vendendo o viño a cinco ou seis euros. Mais iso non é rendíbel. Aquí só cabe apostar pola calidade de verdade, a singularidade e a saúde, que están moi ligadas entre si. Agora tamén están a asesorar noutros territorios da Galiza. Como asesor e enólogo si estou traballando noutros recunchos, todos eles con trazos comúns: zonas moi virxes, recuperando variedades, axudando a través da miña consultoría enolóxica a pór en valor territorios e zonas limítrofes de cultivo, como Negueira de Muñiz... E logo tamén asesoro outras parroquias do país axudando pequenos proxectos que apostan pola calidade e que queren mostrar o terruño e ser viábeis en base á calidade e o carácter. Recomendo aqueles viños de produtoras e produtores que teñan sensibilidade coa terra Que viños recomendaría? Recomendo aqueles viños de produtoras e produtores que teñan sensibilidade coa terra, que aposten por ese carácter terroir e por recuperar variedades autóctonas, que non desexen un viño que explota a terra e que sexan produtores que mimen o viñedo, as cepas e que fagan unha agricultura sostíbel. Refírome pois a pequenas producións coidadas que buscan a viabilidade elaborando viños moi singulares e diferentes. E todo isto debuxa unha heteroxeneidade vitivinícola moi importante no mapa galego, porque é certo que a Galiza é unha zona moi heteroxénea e, de respectarse a cultura vitivínicola e de facerse o viño ecosostíbel, este saberá diferente dun sitio a outro, achegándonos sensacións distintas. Que ten que mudar entón? A nivel galego estamos nun momento moi importante no que a Galiza se perfila como unha zona con moito potencial e futuro mais é o momento de mudar as liñas de actuación do territorio, apostando de verdade por unha viticultura tradicional e de calidade, e non ir cara a unha viticultura de superprodución. Aí si que non habería viabilidade. Estamos pois no momento de preservar o legado cultural, a biodiversidade e pór en valor esta terra a través dos viños.