As dúas mil persoas que participaron na marcha celebrada polas rúas da cidade a prol da abolición deste tipo de espectáculos chocaron coas apenas un milleiro que acudiron ás corridas de touros nas súas dúas primeiras citas, dobrándose esa asistencia o domingo cun cartel encabezado por figuras do mundo da prensa rosa. As bancadas baleiras do Coliseo -con capacidade para 8.000 persoas- nun espectáculo que rexeita a maioría da poboación e que apenas conta cunha afección moi minoritaria pero en boa parte pertencente aos sectores máis poderosos e conservadores da urbe poñen en dúbida a continuidade da feira, posto que a empresa que a xestiona non está interesada en seguir, dado que causa importantes perdas malia o apoio do concello, duns 90.000 euros por vía indirecta.
A evidencia do fracaso das touradas é tal que mesmo o alcalde do PP, Carlos Negreira, evitou comprometerse claramente coa súa continuidade nas festas do ano que vén, o que se une ao rexeitamento total de BNG e EU, ao que agora se suma o propio PSOE que puxo en marcha esta actividade a principios dos anos noventa, en pleno vazquismo.
Ante un horizonte sen touradas -que entenden como unha mostra de posición e case un dereito- os taurinos da cidade xa comezan a presionar para que se manteñan os festexos e o apoio municipal, posto que sen o mesmo é moi complicado que algunha empresa organice a deficitaria feira. E para lanzar mensaxes nese sentido xa utilizaron La Voz de Galicia, onde nun artigo asinado polo responsábel local do periódico deféndese a súa continuidade a base de datos dubidosos, cando non falsos.
Así, La Voz afirma que só foron 200 @s manifestantes contra as touradas cando as imaxes proban que ese número se multiplicou varias veces e -en contra de calquera enquisa ou pulso da rúa- chega a afirmar que estes teñen “un nulo respaldo social”. De BNG, EU e incluso PSOE dise que queren sacar votos coa súa postura neste tema. Á formación nacionalista mesmo a acusa de si apoiar a feira de Pontevedra a pesar de que o seu goberno alí non achega nin un peso a estes eventos, pero non ten competencias para prohibilos. Ademais, esaxera moito a asistencia ao Coliseo, critica ao alcalde por non ser moi partidario das touradas e márcalle unha folla de ruta -axudas públicas incluídas- para continuar cun espectáculo protestado e que apenas xera interese na Coruña alén dun pequeno sector elitista.
