Elimínase a obrigatoriedade de opositar para interinos e substitutos e implántase un novo sistema de chamamentos

O director xeral de Centros e Recursos Humanos, Jesús Álvarez, e representantes das organizacións sindicais CC.OO., ANPE, UXT e CSIF asinaron este 11 de febreiro a supresión do deber do persoal interino e substituto de presentarse ás oposicións, acordando tamén un cambio no sistema de aviso. Con todo, e malia apoiar as melloras introducidas, a CIG-Ensino considera que se trata “dunha oportunidade perdida” e denuncia que non houbo vontade real de negociación.

En concreto, asinouse unha nova addenda ao acordo do 20 de xuño de 1995, polo que se regulan as condicións de traballo do persoal docente interino e substituto dependente da Consellería de Educación, Ciencia, Universidades e Formación Profesional. Desta forma, elimínase a obrigatoriedade de que o persoal interino e substituto teña que presentarse ás oposicións para manter a súa posición consolidada nas listaxes, unha medida que, segundo defendeu o Goberno galego, permitirá “axilizar o proceso e mellorar o funcionamento dos tribunais de oposición”.

Ao mesmo tempo, modifícase o sistema de chamamentos para cubrir substitucións, que até o de agora se realizaba por vía telefónica. O novo modelo substituirá este procedemento por un sistema xestionado mediante unha aplicación informática, e os chamamentos efectuaranse a través de convocatoria, segundo os datos de contacto que consten na Consellería. Así, as persoas convocadas disporán dun prazo de 24 horas para seleccionar a orde das vacantes ofertadas.

Valoracións ao acordo

Desde ANPE Galiza, o seu presidente, Julio Trashorras, asegurou que “estas dúas modificacións non caen do ceo, senón que son froito do traballo das organizacións sindicais que asinan os acordos”. Na mesma liña, o secretario de UXT-Ensino, Cristóbal Salgueiro, valorou “moi positivamente” a addenda, que considera que “vai axilizar o proceso”, e insistiu en que é resultado do labor da comisión de seguimento do acordo de melloras.

Pola súa parte, o secretario xeral de Pública de CC.OO. Ensino, Borja Campos, sinalou que con estas modificacións “a distribución de prazas vai ser máis realista, acorde con quen realmente quere conseguir a praza”. Para CSIF Ensino, trátase “dun avance en dereitos, en seguridade xurídica e en sentido común”, segundo destacou a súa presidenta, Rosa Silva.

Pola contra, a secretaria nacional da CIG-Ensino, Laura Arroxo, cualificou os cambios como “unha nova oportunidade perdida” para mellorar os dereitos do colectivo. Segundo defendeu, o conseguido non é suficiente. “Na Mesa Sectorial, a CIG-Ensino reclamou unha cláusula de estabilidade para o persoal interino con máis antigüidade e que se cumpra o pagamento do verán ao persoal substituto con máis de cinco meses e medio traballados”, lembrou.

Ademais, rexeitou o “sistema de penalizacións” na adxudicación das substitucións. “Se a persoa interesada non xustifica adecuadamente ou non solicita todas as prazas ás que está obrigada, será excluída dos chamamentos durante 30 días lectivos a primeira vez”, criticou.

Segundo a organización, a CIG-Ensino foi a única central sindical que propuxo melloras ao texto do acordo na Mesa Sectorial —como volver ao baremo para ordenar as listas abertas ou modificar as zonas para realizar substitucións— co obxectivo de aproveitar esta modificación para incorporar demandas do persoal interino e substituto. Porén, aseguran que a Administración deixou claro que non ía incorporar ningunha achega.

Neste sentido, a CIG-Ensino afeoulle á Administración que levara o texto á Mesa Sectorial “por puro trámite” e sen intención de negociar modificacións. A organización incidiu en que non vai ser “cómplice dun acordo que non se cumpre ano tras ano”, en referencia á cláusula que establece que o persoal substituto que traballe ao longo do curso máis de cinco meses e medio terá nomeamento no verán e cobrará a parte proporcional correspondente.