Editorial Compostela, ex titular de ‘El Correo Gallego’, entre os morosos galegos con Facenda

Editorial Compostela S.A., con case 1 millón de euros de débeda, figura este ano na lista de contribuíntes que deben a Facenda máis de 600.000 euros.

De acordo coa décima listaxe de debedores con Facenda publicada esta sexta feira, os morosos galegos mantéñense sen gran variación respecto a anos pasados.

Entra no listado a Editorial Compostela S.A., que era titular da cabeceira compostelá El Correo Gallego. O xulgado do mercantil número 2 da Coruña resolveu a venda ao Grupo Prensa Ibérica por 1,6 millóns de euros o pasado novembro.

Agora, a listaxe da Axencia Tributaria recolle unha débeda de 952.960,61 euros de Editorial Compostela con Facenda.

Polo demais, continúan Epaat S.L. con máis de 7,98 millóns, Galega de Moenda de Clinker SLU con case 6,32 millóns, Clesa S.L. con case 6,7 millóns e Martinsa-Fadesa S.A. con máis de 5,94 millóns. A que xa non está é Limpeza do Noroeste, de Vigo.

Por orde alfabética, seguen algúns morosos como Acerías As Pontes (1,69 millóns), Carburantes Noroeste S.L. (case 3,5 millóns), Cinur Consultores Urbanísticos e Inmobiliarios S.L. (case 3,3 millóns),

Tamén están Compañía de Protección e Vixilancia Galaica S.A. (4,6 millóns), Confeccións Deus S.L. (3,3 millóns), Construcións Mon S.L. (3,3 millóns), Energal Distribucion de Biocarburantes S.L. (case 5,99 millóns), Ferralla Lois S.L. (3,35 millóns), Freiremar S.A. (5,62 millóns) e Inalcuba S.L. (3,5 millóns).